طالش
بین الاقوامی معیار کے اداکار تھے

آغا طالش ، پاکستان کے عالمی معیار کے سب سے بہترین اداکار تھے جنھوں نے بہت سی فلموں میں بڑے بڑے یادگار کردار کیے تھے۔ ایسی فلموں میں فلم شہید (1962) ، فرنگی (1964) اور زرقا (1969) کے لازوال کرداروں نے انھیں امر کر دیا تھا۔۔!

طالش کا فلمی کیرئر

طالش نے ساڑھے چار سو سے زائد فلموں میں کام کیا تھا۔ تقسیم سے قبل ان کی پہلی فلم سرائے کے باہر (1947) تھی جو لاہور میں بنی تھی۔ تقسیم کے بعد ان کہ پہلی فلم نتھ (1952) تھی لیکن ابتدائی پچاس کے قریب فلموں میں وہ گمنام رہے تھے۔ اس دوران انھوں نے ہیرو ، ولن ، معاون اور مزاحیہ اداکار کے طور پر بھی کام کیا تھا۔

فلم گڈی گڈا (1956) میں وہ سدھیر کے رقیب تھے جو مسرت نذیر کو متاثر کرنے کی بڑی کوشش کرتے ہیں۔ ایسے دلچسپ رومانٹک کردار میں شاید ہی انھیں کسی فلم دیکھا گیا ہوگا حالانکہ فلم دربار حبیب (1956) اور توحید (1958) میں وہ روایتی ہیرو تھے لیکن دونوں مذہبی فلمیں تھیں جو روایتی رومانٹک کرداروں سے پاک تھیں۔

فلم جبرو (1956) ، سہتی (1957) اور آدمی (1958) میں وہ مکمل کامیڈین اداکار تھے اور بڑے کامیاب رہے تھے۔

طالش کو بریک تھرو ملا

فلم شہید (1962) میں طالش نے عالمی میعار کا رول کیا تھا

طالش کو بریک تھرو فلم سات لاکھ (1957) سے ملا تھا جب ان پر سلیم رضا کا سدا بہار گیت

• یارو مجھے معاف رکھو ، میں نشے میں ہوں۔۔

فلمایا گیا تھا لیکن ان کی اصل پہچان فلم شہید (1962) کا وہ منفرد کردار تھا جو پاکستانی فلموں میں اس سے قبل نہیں دیکھا گیا تھا۔

ہدایتکار خلیل قیصر کی اس عالمی میعار کی فلم میں طالش نے ایک انگریز "اجنبی" کا کردار کیا تھا جو تیل کی تلاش میں صحرائے عرب کی خاک چھانتے ہوئے اپنی منزل پر پہنچتا ہے اور مقامی قبیلے میں نفاق ڈال کر اپنا مقصد حاصل کر لیتا ہے۔

اس یادگار کردار کے بعد انھیں بڑے بھاری کم رول ملنے لگے تھے۔ سپر ہٹ فلم فرنگی (1964) کا ٹائٹل رول بھی طالش نے ہی کیا تھا جبکہ ان کے فلمی کیرئر کا سب سے بڑا کردار ایک یہودی میجر کا کردار تھا جو فلمساز اور ہدایتکار ریاض شاہد کی فلم زرقا (1969) میں تھا۔

یہ میری زندگی کی دیکھی ہوئی پہلی اردو فلم تھی اور اتنی ڈراؤنی ثابت ہوئی تھی کہ اس کا پورا واقعہ سابقہ ویب سائٹ پر درج ہے۔

فلم یہ امن (1971) میں ایک ہندو کا کردار ہو یا مختلف فلموں میں نوابوں وغیرہ کے کردار ، وہ ہر روپ میں ایسے لگتے تھے کہ جیسے یہ کردار انھی کے لیے لکھے گئے تھے۔

طالش پر فلمائے ہوئے گیت

طالش پر بہت کم گیت فلمائے گئے تھے جن میں سے بیشتر گیت مسعودرانا کے گائے ہوئے تھے۔ ان کا پہلا ساتھ ہدایتکار حیدرچوہدری کی پنجابی فلم ڈولی (1965) میں تھا جس میں فلمی صورتحال کے مطابق مسعودرانا کا ایک دوہا طالش کے پس منظر میں فلمایا گیا تھا

• ہتھی کیتا اے تینوں وداع دھیئے۔۔

ان کا دوسرا ساتھ ہدایتکار ایم سلیم کی پنجابی فلم گوانڈی (1966) میں تھا جس میں ایک سولو گیت طالش پر فلمایا گیا تھا

• سر دے مل شہادت ملدی ، پاکستان دے شیرو۔۔

یہ ایک ملی ترانہ تھا جو اس فلم کا مرکزی خیال بھی تھا۔ یہ ایک پروپیگنڈہ فلم تھی جو پاکستان اور بھارت کے تعلقات پر بنائی گئی تھی۔ طالش ، مسلمان اور پاکستانی جبکہ اے شاہ شکار پوری ، ہندو اور بھارتی کے کرداروں میں اس فلم کے مرکزی کردار تھے۔

اس فلم میں ہی ایک دلچسپ کورس گیت تھا جو احمدرشدی ، مسعودرانا اور ساتھیوں کی آوازوں میں گایا گیا تھا اور طالش ، اے شاہ اور ساتھیوں پر فلمایا گیا تھا

• جوڑ پے گیا دھنے دی پتنگ دا تے منہے دی پتنگ دا۔۔

تقسیم سے قبل کے اس منظر میں کھیل ہی کھیل میں مذہبی جذبات بھڑک جاتے ہیں جو ہندو مسلم فساد کی شکل اختیار کر لیتے ہیں۔ اس واقعہ سے پاکستان کے قیام کی اہمیت کو اجاگر کرنے کی کوشش کی گئی تھی۔

طالش ، فلم بڑے میاں دیوانے (1977) میں

طالش پر ہدایتکار امین ملک کی پنجابی فلم پیداگیر (1966) میں بھی مسعودرانا کا ایک یادگار گیت فلمایا گیا تھا

• ایس جگ دے بازار وچ یارو ، سودا ہر مل دا۔۔

یہ گیت عورتوں کی دلالی کے موضوع پر گایا گیا ایک بڑا بامقصد گیت تھا جو اس فلم کا مرکزی خیال بھی تھا۔ اکمل نے ڈبل رول میں ایک خوفناک دلال کے علاوہ ایک مزاحیہ ہیرو کا رول بھی کیا تھا جبکہ طالش صرف یہی گیت گانے کے لیے آتے ہیں۔

مسعودرانا کا گایا ہوا طالش کے پس منظر میں ایک جذباتی گیت ، ہدایتکار شوکت حسین رضوی کی اردو فلم عاشق (1968) میں بھی تھا

• اک بار گلے سے لگا لے ماں۔۔

اس گیت میں ایک شخص کی جیل جاتے ہوئے اپنی ماں کو خدا حافظ کہتے ہوئے کیفیت بیان کی گئی تھی۔

ہدایتکار ایس سلیمان کی فلم تیرے بنا کیا جینا (1982) میں شادی کے ایک گیت میں موسیقار کمال احمد نے ایک بڑا خوبصورت ٹچ دیا تھا جب مہناز کے گیت

• ہریالی بنو ، مہندی لاون دے۔۔

کے دوران دو بڈھے طالش اور مرزا غضنفر بیگ اچانک مہمانوں میں آگر ٹھمکے لگا کر گاتے ہیں اور میلہ لوٹ لیتے ہیں۔

ایسا ہی ایک گیت ہدایتکار اسلم ڈار کی نیم مزاحیہ فلم بڑے میاں دیوانے (1977) میں احمدرشدی کا یہ گیت تھا

• لیٹ می ڈانس۔۔

بھی طالش پر فلمایا گیا تھا جس میں ان کا ڈانس قابل دید تھا جو یہ ثابت کرتا تھا کہ وہ کتنے بڑے ہر فن مولا فنکار تھے۔

طالش پر مسعودرانا کا آخری گیت فلم روٹی (1988) میں فلمایا گیا تھا

• او شیطانا ، روٹی دیا نانا۔۔

یہ گیت ایک باپ ، اپنے بیٹے کی بھوک کے ہاتھوں موت پر پاگل ہو کر گاتا ہے۔

طالش کی آخری فلم میری توبہ (2000) تھی جو ان کے انتقال کے دو سال بعد ریلیز ہوئی تھی۔