طفیل فاروقی

فن موسیقی میں بہت سے نام ایسے ہیں کہ جن پر وقت کی گرد پڑ چکی ہے لیکن اپنے وقت میں وہ بڑے نامور اور قابل قدر فنکار ہوتے تھے۔

ایسے ہی ناموں میں ایک نام موسیقار طفیل فاروقی کا تھا۔ بنیادی طور پر وہ ریڈیو کے موسیقار تھے اور علامہ اقبالؒ کی مشہور زمانہ بچوں کی نظم

• لب پہ آتی ہے دعا بن کے تمنا میری۔۔

کی شاندار دھن ان کا ایک بہت بڑا کارنامہ تھا جو منور سلطانہ کی آواز میں اکثر ریڈیو پر سننے کا موقع ملتا تھا۔

طفیل فاروقی کا فلمی کیرئر

طفیل فاروقی

طفیل فاروقی نے تقسیم سے قبل لاہور میں بننے والی دو ہندی/اردو فلموں سونا چاندی (1946) اور دیکھو جی (1947) میں موسیقی دی تھی۔ ان فلموں میں انھوں نے محمدرفیع اور شمشاد بیگم سے گیت گوائے تھے اور ایک گیت بڑا مشہور ہوا تھا

• جھمکا گرا رے بریلی کے بازار میں۔۔

اس گیت کی بعد میں دوسروں نے بھی نقل کی تھی۔

قیام پاکستان کے بعد ان کی پہلی فلم برکھا (1953) تھی جس میں منور سلطانہ اور علی بخش ظہور کا گایا ہوا یہ دوگانا بڑا مقبول ہوا تھا

• تو ساز بجاتا جا ، آواز میں پیار کا بھر کے رنگ ، میرے ساتھ گاتا جا ، آنکھوں میں سماتا جا۔۔

فلم بودی شاہ (1959) میں وارث لدھیانوی کا لکھا ہوا اور اقبال بانو کا گایا ہوا یہ پنجابی گیت

• چناں ، تیری یاد وچ اوسیاں پاواں ، اکھ وی نہ لاواں ، وے میں ساری رات جاگاں۔۔

کیا دلسوز گیت تھا۔ اسی فلم میں منیر حسین کا تھیم سانگ

• ایس دنیا دا چکر بودی ، ایوں چلدیاں رہنا اے۔۔

بھی بڑا زبردست تھا۔ فلم بہروپیا (1960) میں ایکبار پھر اقبال بانو کی آواز میں یہ دلسوز گیت بھی کیا لاجواب تھا

• وے ہولی ہولی بجھ دیویا ، اج سجرے سجن ویری ہوئے ، اسیں رج کے نہ روئے وے۔۔

احمدرشدی کی پہلی پنجابی فلم

فلم چوہدری (1962) میں موسیقار طفیل فاروقی نے اردو فلموں کے عظیم گلوکار احمدرشدی کو پہلی بار کسی پنجابی فلم میں گانے کا موقع دیا تھا۔ اس فلم میں ان کا نذیربیگم کے ساتھ گایا ہوا گیت

• پیار تیرا میں جھولی پایا تے طعنے سنے شریکاں۔۔

ایک مزاحیہ گیت تھا جو اداکارہ لیلیٰ اور اداکار آصف جاہ پر فلمایا گیا تھا۔

احمدرشدی کا ایک منفرد ریکارڈ

فلم چوڑیاں (1963) میں انھوں نے احمدرشدی سے تین گیت گوائے تھے جو رشدی صاحب کے فلمی کیرئر کا واحد موقع تھا کیونکہ اس کے بعد انھیں کبھی کسی پنجابی فلم میں اتنے گیت گانے کا موقع نہیں ملا تھا۔

رشدی صاحب کے فلم چوڑیاں (1963) میں گائے ہوئے ان تینوں گیتوں میں سے ایک ایک گیت فلم کے ہیرو ، ولن اور مزاحیہ اداکار پر فلمائے گئے تھے جو ایک منفرد فلمی ریکارڈ ہے۔ میری معلومات کے مطابق آج تک کسی گلوکار نے کسی ایک ہی فلم کے تینوں اہم کرداروں کے لیے نغمہ سرائی نہیں کی تھی۔

طفیل فاروقی اور مسعودرانا کا ساتھ

پگڑی سنبھال جٹا (1968)

طفیل فاروقی کی مسعودرانا کے ساتھ پہلی فلم من موجی (1965) تھی جس میں انھوں نے یہ مزاحیہ گیت گوایا تھا

• آنے دا گلاس پیو ، آنے دا گلاس۔۔

یہ گیت وقت کے مقبول ترین مزاحیہ اداکار آصف جاہ پر فلمایا گیا تھا۔

اس فلم کی خاص بات یہ تھی کہ وقت کے دو سپرسٹارز سدھیر اور اکمل اپنے عروج کے دور میں ایک ساتھ نظر آئے تھے۔ ان کی جوڑیاں بالترتیب شیریں اور فردوس کے ساتھ تھیں اور ان چاروں پر یہ دلکش رومانٹک کورس گیت فلمایا گیا تھا

• اسمانی تارے نیں ، بازی دل والی چناں وے ، اسیں جت کے وی ہارے وے۔۔

مالا ، منیر حسین ، نسیم بیگم اور باتش کی آوازوں میں اس گیت کی دھن دلوں کے تار چھیڑ دیتی ہے۔

فلم ماجھے دی جٹی (1966) میں نسیم بیگم کا یہ گیت بھی بڑا مقبول ہوا تھا

• ٹانگہ آگیا کچہریوں خالی تے سجناں نوں قید بول گئی۔۔

فلم پگڑی سنبھال جٹا (1968) میں ملکہ ترنم نورجہاں کی آواز میں یہ گیت سپرہٹ ہوا تھا

• ربا ، ایدھے نالوں موت سہالی ، وچھوڑا مکے سجناں دا۔۔

اسی فلم میں فاروقی صاحب نے پنجابی فلموں کی تاریخ کا واحد سپرہٹ گیت جو عید کے موضوع پر تھا ، گلوکارہ نذیربیگم اور مالا سے گوایا تھا

سوہنیو ، عید مبارک

• چن چن دے سامنے آگیا ، میں دوواں توں صدقے جاواں ، سوہنیو ، عید مبارک۔۔

اسی سال کی نغماتی فلم بدلہ (1968) میں طفیل فاروقی کے یہ دو گیت سپرہٹ ہوئے تھے

• چٹی گھوڑی تے کاٹھی تلے دار نی سیو ، دوروں تکاں تے لگے تھانیدار نی سیو ، میرا ماہی نال ہوگیا پیار نی سیو۔۔

جسے میڈم نورجہاں نے اپنی لافانی آواز میں گایا تھا اور گلی گلی گونجنے والا گیت تھا۔ دوسرا گیت مسعودرانا کا یہ سپرہٹ تھیم سانگ تھا جو ان کے ٹاپ ٹین پنجابی گیتوں میں سے ایک ہے

• جہیڑے توڑدے نیں دل برباد ہون گے ، اج کسے نوں روایا ، کل آپ رون گے۔۔

آج بھی یہ گیت سنوں تو وقت رک سا جاتا ہے اور مسعودرانا کی آواز کے زیروبم میں کھو جاتا ہوں۔

فلم چن چوہدویں دا (1968) میں رونا لیلیٰ اور مسعودرانا کا یہ دلکش دوگانا بھی تھا

• کرنی آن اج اقرار تیرے سامنے ، لکیا نئیں رہندا ہن پیار تیرے سامنے۔۔

اسی فلم میں مہدی حسن کا یہ گیت بھی بڑا پسند کیا گیا تھا

• چن ہووے چوہدویں دا ، پاویں پہلی رات دا ، میرے ایس دھرتی دے چن دا جواب نئیں۔۔

موسیقار طفیل فاروقی نے فلم اوکھا جٹ (1969) میں ملکہ ترنم نورجہاں کی سدابہار آواز میں یہ دلکش گیت گوایا تھا جسے بار بار گنگنانے سے بھی جی نہیں بھرتا

• تینوں تکدی نہ رجاں ، ہوون دولکھ نیناں ، اک کھولاں ، اک کجاں۔۔

فلم جگو (1969) میں جہاں مسعودرانا کا یہ تھیم سانگ بڑے کمال کا تھا

• ایک پتھر نوں پتر لگا ، پُتر جس دا ناں ، دل دا دکھ ، جگر دا ٹکڑا ، لے کے ٹر پئی ماں۔۔

وہاں منیر حسین اور نسیم بیگم کا الگ الگ گایا ہوا یہ گیت بھی بڑا مقبول ہوا تھا

• سوہنیاں نیناں والیے نین ملاندی جا ، اک گبھرو دلدار نوں مست بنادی جا۔۔

میرا سوہنا دیس کساناں دا

موسیقار طفیل فاروقی کی دیر سے ریلیز ہونے والی فلم بہادرکسان (1970) میں مسعودرانا کے تین گیت تھے۔ یہ فلم اکمل کی موت کے تین سال بعد ریلیز ہوئی تھی اور ظاہر ہے کہ اس فلم کے گیت جون 1967ء سے قبل گائے اور فلمائے جا چکے تھے۔ اس فلم کا سب سے مشہور گیت تو ایک کورس گیت تھا

• میرا سوہنا دیس کساناں دا ، شہ زوراں دا پہلواناں دا۔۔

جسے مسعودرانا اور ساتھیوں نے گایا تھا۔ یہ گیت بھارتی فلم نیا دور (1957) میں محمدرفیع کے گیت "یہ دیش ہے ویر جوانوں کا۔۔" کا پنجابی ورژن تھا جسے احمدراہی نے لفظ بہ لفظ کاپی کرنے کی کوشش کی تھی۔

مجھے یاد ہے کہ ریڈیو پر یہ گیت اکثر گونجتا تھا اور خاص طور پر ریڈیو پاکستان لاہور کے زرعی پروگرام میں بڑا مقبول ہوتا تھا۔ اس فلم میں ایک دوگانے کے علاوہ مسعودرانا کا یہ سنجیدہ گیت بڑا دلسوز تھا

• اسی دل دیے کہ جان پر اے دلدار نئیں ، اک رن تے دوجی تلوار ، کسے دے یار نئیں۔۔

یاد رہے کہ اکمل کی اب تک کی آخری فلم سجرا پیار ہے جو 2016ء میں ریلیز ہوئی تھی۔

الف اللہ ، چنبے دی بوٹی

فلم جوڑ جواناں دا (1971) میں طفیل فاروقی نے مسعودرانا اور ساتھیوں سے پنجابی زبان کے عظیم صوفی شاعر حضرت سلطان باہوؒ کا کلام

• الف اللہ ، چنبے دی بوٹی۔۔

گوایا تھا جو فلم کی ہائی لائٹ تھا۔

فلم ظلم کدے نئیں پھلدا (1974) میں یہ دلچسپ مزاحیہ گیت بھی تھا جو اداکار منیر ظریف پر فلمایا گیا تھا

• اکھ سوہنئے دے نال نہ لڑائیں موج دینا۔۔

ان کی آخری فلم کمانڈر (1984) تھی جس میں ناہیداختر اور مسعودرانا کی یہ مزاحیہ قوالی جو نازلی اور مصطفیٰ قریشی پر فلمائی گئی تھی

• بڑی عقل کردے ، جے شادی نہ کردے۔۔

موسیقار طفیل فاروقی نے 42 فلموں میں موسیقی دی جن میں تین چوتھائی پنجابی فلمیں تھیں۔ اڑھائی سو سے زائد گیتوں کی دھنیں بنائی تھیں۔ وہ گلوکارہ پکھراج پپو کے شوہر تھے اور ان کا انتقال 1988ء میں ہوا تھا۔

Masood Rana & Ashiq Hussain:

0 joint Online films

Masood Rana & Ashiq Hussain:

Total 12 joint films