مسعودرانا کو دریافت کرنے کا اعزاز اصل میں معروف فلمساز اور ہدایتکار اقبال شہزاد کو حاصل ہے۔۔!

اقبال شہزاد
نے بنجارن ، بدنام اور بازی جیسی
کامیاب فلمیں بنائی تھیں

مسعودرانا اور اقبال شہزاد فلم بنجارن (1962) میں

مسعودرانا کی پہلی فلم انقلاب ، ایک سرکاری پروپیگنڈہ فلم تھی جو ایک ناکام اور گمنام فلم ثابت ہوئی تھی اور محض کراچی تک محدود رہی تھی۔ لفظ "انقلاب" اس وقت اسی طرح بدنام ہوچکا تھا جس طرح آج کل "تبدیلی" ، "کرپشن" یا "نیا پاکستان" کے الفاظ اپنی کشش کھو چکے ہیں۔

"پاکستانی رفیع"

فلمساز اقبال شہزاد نے اداکار ساقی کی معرفت مسعودرانا کو کراچی سٹیج پر گاتے ہوئے سنا اور بےحد متاثر ہوئے تھے۔ انھوں نے اپنی دوسری فلم بنجارن (1962) کی پبلسٹی میں انھیں ، "پاکستانی رفیع" کے طورپر متعارف کروایا تھا۔

اگر مسعودرانا کو یہ موقع نہ ملتا تو عین ممکن تھاکہ وہ بھی اپنے میوزیکل گروپ کے دیگر ساتھی فنکاروں ندیم اور اخلاق احمد اور اپنے سینئر گلوکاروں مہدی حسن اور احمدرشدی کی طرح طویل جدوجہد کرتے رہتے۔

دلچسپ بات یہ ہے کہ فلم بنجارن میں گائے ہوئے مسعودرانا کے چاروں گیتوں میں سے کوئی ایک بھی ہٹ گیت نہیں تھا لیکن اپنی دلکش آواز اور انداز کی وجہ سے انھیں بریک تھرو مل گئی تھی اور وہ فلموں کی ضرورت بن گئے تھے۔

فلم بنجارن (1962) ، موسیقار دیبو بھٹا چاریہ اور گلوکارہ آئرن پروین کے لیے بھی ایک سنگ میل ثابت ہوئی تھی اور اردو فلموں کے نامور نغمہ نگار مسرور انور کی پہلی فلم بھی تھی۔

اقبال شہزاد کی پہلی فلم

فلمساز اور ہدایتکار اقبال شہزاد ، بنیادی طور پر ایک ساؤنڈ ریکارڈسٹ تھے۔ معروف کرکٹ کھلاڑی وقار حسن اور پرویز سجاد ان کے بھائی تھے۔ بطور فلمساز ان کی پہلی فلم رات کے راہی (1960) تھی جو ایک جاسوسی ٹائپ فلم تھی۔ اس فلم کی ہیروئن ریحانہ تھی جس سے انھوں نے شادی بھی کی تھی۔ اس فلم کے روایتی ہیرو درپن تھے جبکہ اردو فلموں کے مایہ ناز مزاحیہ اداکار لہری صاحب نے سیکنڈ ہیرو کا رول کیا تھا اور شمیم آراء ان کی ہیروئن بنی تھی۔ اس فلم میں زبیدہ خانم کا ایک گیت سپر ہٹ ہوا تھا

• کیا ہوا دل پہ ستم ، تم نہ سمجھو گے بلم۔۔

اقبال شہزاد کی شاہکار فلم بدنام
سترہ روسی زبانوں میں
ڈب ہو کر ریلیز ہوئی تھی

فلم بدنام (1966)

محمدعلی کی بطور ہیرو پہلی فلم شرارت (1963)

اقبال شہزاد نے بطور فلمساز اپنی تیسری فلم شرارت میں اردو فلموں کے عظیم فنکار محمدعلی صاحب کو پہلی بار ہیرو کے کردار میں پیش کیا تھا اور ان پر مسعودرانا کا ایک سپر ہٹ گیت

اے دل تجھے اب ان سے ، یہ کیسی شکایت ہے۔۔

• فلمایا گیا تھا۔ اس فلم میں ان کی ہیروئنیں لیلیٰ اور بہار تھیں۔

مسعودرانا کا پہلا اردو تھیم سانگ

پروڈیوسر کے طور پر اقبال شہزاد کی چوتھی فلم بیٹی ، ایک یادگار سوشل فلم تھی جو ماں باپ سے بچھڑی ہوئی ایک ایسی بچی کی غمناک کہانی تھی جس پر ہمارا معاشرہ کس طرح ظالمانہ سلوک کرتاہے۔ اس موضوع پرمسعودرانا نے پہلی بار کسی اردو فلم کا تھیم سانگ گایا تھا

• ایسے بھی معصوم ہیں اس دنیا میں جانے کتنے۔

" جو بے حد پسند کیا گیا تھا۔ اس فلم میں گٹو نامی بچی نے غضب کی اداکاری کی تھی جبکہ مرکزی کردار نیلو اور اعجاز کے تھے۔

اقبال شہزاد کی شاہکار فلم بدنام (1966)

اقبال شہزاد ، اپنی پانچویں فلم بدنام کے فلمساز ہونے کے علاوہ پہلی بار ہدایتکار بھی تھے اور انھوں نے ایک منجھے ہوئے فلم ڈائریکٹر کی طرح ایک شاہکار فلم بنائی تھی۔

عظیم افسانہ نگار سعادت حسن منٹو کے افسانہ جھمکے سے ماخوذ اس فلم کے مکالمے اور منظر نامہ ریاض شاہد جیسے لکھاری کے زور قلم کا نتیجہ تھا اور علاؤالدین جیسے بے مثل پرفارمر کی لاجواب کردارنگاری ، اس فلم کی ہائی لائٹ تھی۔ پاکستان کی کسی اردو فلم کے مکالمے اتنے مشہور نہیں ہوئے تھے ، جتنے اس فلم کے ہوئے تھے۔

فلم بدنام نہ صرف ایک بہت بڑی سماجی اور اصلاحی فلم تھی بلکہ ایک شاہکار نغماتی فلم بھی تھی جس کے آدھے سے زیادہ گیت مسعودرانا کی آواز میں تھے جن میں فلم کا تھیم سانگ

• ہم بھی مسافر ، تم بھی مسافر۔۔

فلم کی جان تھا۔ اس فلم میں ریڈیو گلوکارہ ثریا ملتانیکر کی ایک غزل بھی شامل کی گئی تھی

• بڑے بے مروت ہیں ، یہ حسن والے۔۔

جس کی مقبولیت کا یہ عالم تھا کہ اس کی رائلٹی سے فلم کے جملہ اخراجات پورے ہو گئے تھے۔

فلم بدنام کی خاص بات یہ بھی تھی کہ اسے تاشقند کے فلمی میلے میں نمائش کے لیے پیش کیا گیا تھا اور اتنی پسند کی گئی تھی کہ سترہ زبانوں میں ڈب کر کے اسے روس کے مختلف شہروں میں دکھایا گیا تھا۔

اقبال شہزاد کی ایکشن فلم

بطور فلمساز اقبال شہزاد کی چھٹی فلم ایک ہی راستہ (1968) تھی جو ان کی روایت سے ہٹ کرایک ایکشن فلم تھی جس میں سدھیر مرکزی کردار میں تھے اور رانی ان کے مدمقابل تھی۔ اس فلم میں مسعودرانا کے ایک ملی ترانے

• اے وطن کی سرزمین ، تیرا ہر ذرہ حسین۔۔

کے دوران پاکستان کی تعمیر و ترقی کی ویڈیو بڑی شاندار تھی۔

محمدعلی اور ندیم کی پہلی مشترکہ فلم

اقبال شہزاد کی اگلی فلم بازی (1970) تھی جس کے وہ فلمساز اور ہدایتکار تھے۔ اس فلم میں انھوں نے پہلی بار اردو فلموں کے سپر سٹارز محمدعلی اور ندیم کو اکٹھا کیا تھا جبکہ نشو کو متعارف کروایا گیا تھا۔ اسی فلم میں غزل گائیک حبیب ولی محمد کو بھی پہلی بار گانے کو موقع ملا تھا۔ مسلسل پانچ فلموں کے بعد یہ انکی پہلی فلم تھی جس میں مسعودرانا کا کوئی گیت نہیں تھا۔

اقبال شہزاد کی پہلی پنجابی فلم بندہ بشر (1971) تھی جس کے وہ فلمساز تھے اور ہدایتکار ریاض شاہد کے بھائی فیاض شیخ تھے لیکن یہ ایک ناکام فلم تھی۔

پہلا ڈبل ورژن پنجابی/اردو گیت

اس فلم کی خاص بات یہ تھی کہ اس کے ایک دوگانے کو پنجابی کے علاوہ اردو میں بھی گوایا گیا تھا جو ملکہ ترنم نورجہاں اور مسعودرانا کی آوازوں میں تھا

• دونوں مل کر قسمیں کھائیں۔۔۔

یہ پہلا ڈبل ورژن پنجابی، اردو گیت تھا لیکن اس سے قبل بنگالی اردو ڈبل ورژن گیت گائے جاچکے تھے جن کی ایک بڑی مثال فلم چکوری (1967) تھی جو اصل میں ایک بنگالی فلم تھی اورجس کے اردو گیتوں کی ریکارڈنگ اور مکالموں کی ڈبنگ لاہور فلم سٹوڈیوز میں ہوئی تھی۔

اسی سال ان کی بطور فلمساز دوسری پنجابی فلم بازی گر بھی ریلیز ہوئی تھی اور وہ بھی ایک ناکام فلم تھی۔ ان کی آخری دو فلمیں آرپار (1973) اور ٹائیگر گینگ (1974) بطورہدایتکار ریلیز ہوئی تھیں اور دونوں ناکام تھیں۔

بتایا جاتا ہے کہ اقبال شہزاد کا انتقال 1990 ء میں ہوا تھا۔