حمایت علی شاعر
نے مشہور زمانہ ترانہ
جاگ اٹھا ہے سارا وطن
بھی لکھا تھا

حمایت علی شاعر ، پاکستان کے ایک ممتاز شاعر ،محقق اور فلمی گیت نگار تھے۔

ان کی پہلی فلم اور بھی غم ہیں (1960) تھی لیکن انھیں شہرت فلم دامن (1963) کے گیت

• نہ چھڑا سکو گے دامن ، نہ نظر بچا سکو گے۔۔

سے ملی تھی۔ انھوں نے ایک فلم لوری (1966) بھی پروڈیوس کی تھی۔

جاگ اٹھا ہے سارا وطن

مسعودرانا کے ساتھ ان کا پہلا سنگم فلم بنجارن (1962) میں ہوا تھا اور متعدد یادگار گیت تخلیق ہوئے تھے جن میں فلم مجاہد (1965) میں موسیقار خلیل احمد کی دھن پر یہ مقبول ترین فلمی ترانہ بھی تھا:

• ساتھیو ، مجاہدو ، جاگ اٹھا ہے سارا وطن..

یہ ایک ناقابل فراموش جنگی ترانہ ہے جس کے بارے میں عینی شاہد بتایا کرتے تھے کہ جب فوجی بھائیوں کی حوصلہ افزائی اور تفریح کےلیے موسیقی کے پروگرام ہوتے تھے تو مسعودرانا سٹیج پر نمودار ہوتے ہی اپنی دلکش اور ولولہ انگیز آواز میں فلک شگاف لمبی تان لگاتے "ساتھیو ، مجاہدو۔۔" تو جوش و خروش کا عالم دیدنی ہوتا تھا اور ان کی ایمان افروز آواز ، جوش عباسؑ ، عزم شبیرؑ اور حیدرؑ کی شمشیر کی طرح دشمن پر لرزہ طاری کرتی ہوئی سنائی دیتی تھی اور سننے والا ہر جری صف شکن اور ہر جواں تیغ زن بن جاتا تھا۔

دور ویرانے میں اک شمع ہے روشن کب سے

فلم نائلہ (1965) بھی اپنے وقت کی ایک بہت بڑی نغماتی اور رومانوی فلم تھی جو گلوکارہ مالا کے فلمی کیرئر کی سب سے بڑی فلم تھی۔ اس فلم میں حمایت علی شاعر کا ایک ہی گیت تھا جو دیگر سبھی گیتوں پر بھاری تھا :

• دور ویرانے میں اک شمع ہے روشن کب سے ، کوئی پروانہ ادھر آئے تو کچھ بات بنے..

اس دوگانے میں مالا کے ساتھ مردانہ آواز مسعودرانا کی تھی جسے کبھی میں بھی منیر حسین یا سلیم رضا میں سے کسی ایک کی آواز سمجھتا تھا لیکن جب فلمی گیتوں پر تحقیق کی تو بڑی حیرت ہوئی تھی کہ مسعودرانا کتنے بڑے ہر فن مولا گلوکار تھے۔۔!

کوئی ساتھ دے کہ نہ ساتھ دے

فلم بدنام (1966) میں بھی حمایت علی شاعر کا ایک ہی گیت تھا جو فلم کا تھیم سانگ تھا اور جسے مسعودرانا نے گایا تھا "کوئی ساتھ دے کہ نہ ساتھ دے۔۔" اس گیت کا ذکر دیبو بھٹا چاریہ کے مضمون میں تفصیل سے ہو چکا ہے۔

سامنے رشک قمر ہو تو غزل کیوں نہ کہوں

اسی سال کی فلم میرے محبوب کے سبھی گیت حمایت علی شاعر نے لکھےتھے اور موسیقی خلیل احمد کی تھی۔ اس فلم میں ہیرو اور ہیروئن کے مابین گائیکی کا ایک مقابلہ ہوتا ہے جس میں پہلے فلم کی ہیروئن شمیم آراء پر ملکہ ترنم نورجہاں کی آواز میں یہ غزل فلمائی جاتی ہے "ہر قدم پر نت نئے سانچے میں ڈھل جاتے ہیں لوگ۔۔" اس کے مقابلے میں فلمی ہیرو درپن ، مسعودرانا کی یہ دلکش غزل گاتے ہوئے سنائی دیتے ہیں:

• سامنے رشک قمر ہو تو غزل کیوں نہ کہوں ، کوئی محبوب نظر ہو تو غزل کیوں نہ کہوں..

مقابلہ موسیقی کے منتظمین کے لیے یہ فیصلہ کرنا مشکل ہو جاتا ہے کہ وہ ان دونوں میں سے کس کی گائیکی کو بہتر قرار دیں۔۔ـ مقابلہ برابر رہتا ہے۔۔!

میڈم نورجہاں نے سب سے زیادہ دوگانے مسعودرانا کے ساتھ گائے تھے اور اس فلم میں گایا ہوا ان کا یہ پہلا دوگانا تھا:

• کلی مسکرائی جو گھونگھٹ اٹھا کے ، خدا کی قسم ،تم بہت یاد آئے..

حمایت علی شاعر نے طویل عمر پائی تھی لیکن صرف تین درجن کے قریب فلموں کے نغمات ہی لکھے تھے۔ انھوں نے اپنے فیملی پریشر پر فلمی گیت لکھنے بند کردیے تھے کیونکہ جس نوعیت کے رومانٹک فلمی گیت ہمارے ہاں پسند کیے جاتے ہیں وہ بیشتر مسلم گھرانوں کی روایات و اقدار کے منافی ہوتے ہیں۔