منیر حسین

مسعودرانا کے ابتدائی دور میں گلوکار منیر حسین ، سلیم رضا کے بعد دوسرے مقبول ترین گلوکار ہوتے تھے۔

وہ پاکستانی فلموں کے پہلے مکمل آل راؤنڈ گلوکار تھے اور انھیں کلاسیکل موسیقی پر عبور بھی حاصل تھا لیکن فلمی میعار پر پورا اترنے کے لیے ان کی آواز میں انیس بیس کا فرق تھا جس کے باعث انھیں وہ کامیابی نہ مل سکی تھی جس کے وہ حقدار تھے۔

منیر حسین پر ایک تفصیلی مضمون ، پاکستان فلم میگزین کے سابقہ ورژن میں لکھا جا چکا ہے جس میں ان کے گیتوں کی مکمل تعداد کی معلومات درست نہیں تھیں۔ دیگر فنکاروں کی طرح ان کا فلمی ریکارڈ بھی ابھی تک حتمی نہیں ہے۔

منیر حسین اور مسعودرانا کا ساتھ

منیر حسین ، مسعودرانا ، عنایت حسین بھٹی ،

ناہیداختر ، اے نیتر ، شوکت علی ، دلدار پرویز بھٹی ، آصف جاوید ، ثریا خانم ، امجد پرویز اور امجد بوبی کے ساتھ

پاکستان کے عظیم موسیقار بابا جی اے چشتی نے مسعودرانا کو ان کی دوسری فلم بنجارن (1962) میں سنتے ہی لاہور بھلا بھیجا تھا اور اپنی زیر تکمیل پنجابی فلم رشتہ (1963) میں ایک قوالی گانے کا موقع دیا تھا جس کے بول تھے: " چپ کر دڑ وٹ جا ، نہ عشقے دا کھول خلاصہ۔۔" اپنے پہلے ہی پنجابی گیت میں مسعودرانا کو منیر حسین جیسے اعلیٰ پائے کے گلوکار کا ساتھ ملا تھا۔ اگلے تین عشروں میں ان کا ساتھ ایک درجن سے زائد گیتوں پر محیط تھا جن میں زیادہ تر فلمی قوالیاں تھیں۔

جب کراچی ، روشنیوں کا شہر ہوتا تھا!

1965ء میں ریلیز ہونے والی سابقہ مشرقی پاکستان کی ایک اردو فلم بہانہ کی آؤٹ ڈور شوٹنگ کراچی میں کی گئی تھی۔ یہ وہ دور تھا جب کراچی روشنیوں کا شہر اور امیدوں کا مرکز ہوتا تھا جہاں ملک کے دونوں حصوں سے لوگ بہتر مستقبل کی تلاش میں قسمت آزمائی کے لیے جاتے تھے۔

اس فلم میں اسی موضوع پر ایک بڑا دلچسپ کورس گیت گایا گیا تھا جس میں پہلے منیر حسین بتاتے ہیں کہ وہ بنگالی ہیں اور ڈھاکہ سے آئے ہیں۔ پھرمسعودرانا اپنے بارے میں بتاتے ہیں کہ وہ گوجرانوالہ سے آئے ہیں لیکن سب سے دلچسپ تعارف احمدرشدی کراتے ہیں کہ وہ خود نہیں آئے بلکہ لائے گئے ہیں اور ان کے ابا انھیں لائے تھے ، یعنی وہ مقامی تھے۔ ان تینوں کا متفقہ طور پر یہ شکوہ یہ ہوتا ہے:

• ایسی کراچی سے تو ہم بازآئے ، کام نہ آئے کوئی اپنے پرائے..

اے ماں ، پیاری ماں

کئی برسوں کے وقفہ کے بعد 1969ء کی پنجابی فلم وریام میں مسعودرانا اور منیر حسین نے دو دوگانے گائے تھے جن میں سب سے یادگار اور شاہکار گیت ماں کے مقدس رشتہ پر تھا:

• اے ماں ، پیاری ماں ، ساڈی بُلیاں چوں پھل کھڑدےنیں ، جدوں لینے آں تیرا ناں..

یہ ناقابل فراموش اور بامقصد گیت پنجابی فلموں کی روایتی ماں ، سلمیٰ ممتاز کے لیے گایا گیا تھا اور سدھیر اور حبیب جیسے سپر سٹارز پر فلمایا گیا تھا۔ پہلے میں اس گیت میں مسعودرانا کے ساتھ احمدرشدی کو سمجھتا تھا جس کی وجہ یہ تھی کہ میرے ذہن میں دو گیت گڈمڈ ہو گئے تھے کیونکہ بالکل ایسا ہی ایک گیت اردو فلم قلی (1968) میں بھی تھا "قدموں میں تیرے جنت میری ، تجھ سا کوئی کہاں ، اے ماں ، پیاری ماں.." اور اس گیت میں مسعودرانا کے ساتھ احمدرشدی تھے۔

لال میری پت رکھیو بلا

فلم وریام اس دور کی بہت بڑی نغماتی فلم تھی جس کی موسیقی کالے خان شبو صاحبان نے دی تھی۔ اس فلم کے سبھی گیت مقبول ہوئے تھے جن میں سے ایک فلم کا ٹائٹل سانگ بھی تھا:

• لال میری پت رکھیو بلا جھولے لالن..

اس مشہور زمانہ دھمال کو مسعودرانا اور منیر حسین نے لفظ بہ لفظ ، ہم آواز ہو کرگایا تھا جو شاید ایک منفرد واقعہ تھا۔ اس گیت کا الاپ سائیں اختر کا تھا اور یہ میڈم نورجہاں کی دھمال کے بعد اپنے وقت کی بڑی مقبول دھمال تھی جسے متعدد فلموں میں استعمال کیا گیا تھا۔

منیر حسین اور مسعودرانا کی قوالیاں

ان دونوں عظیم گلوکاروں کا اگلا ساتھ چار فلمی قوالیوں میں ملتا ہے جن میں ایک بات مشترک تھی کہ ان قوالیوں کا بیشتر حصہ منیر حسین گاتے ہیں اور ان کی آواز ایکسٹرا اداکاروں پر فلمائی جاتی ہے لیکن ہیروز پر مسعودرانا کی آواز فلمائی جاتی ہے۔

ان فلموں میں فلم گیت کہیں سنگیت کہیں میں محمدعلی ، فلم لیلیٰ مجنوں (1974) اور انسان اور شیطان (1978) میں وحیدمراد اور فلم جیلر تے قیدی (1975) میں سلطان راہی تھے۔ ایسا ہی ایک گیت فلم سوہنی مہینوال (1976) میں دریائے چناب میں تیرتے ہوئے مٹی کے ایک گھڑے کے پس منظر میں گایا گیا تھا جس کے دو انترے مسعودرانا کی آواز میں تھے جبکہ تیسرا اور آخری انترہ منیر حسین نے گایا تھا جو فلم کے ہیرو یوسف خان پر فلمایا گیا تھا۔

ایک عالمی شہرت یافتہ پاکستانی فلم

انٹرنیشنل گوریلے (1990)

1990ء میں ایک فلم انٹرنیشنل گوریلے بنائی گئی تھی جو ایک انتہائی مضحکہ خیز فلم تھی۔ اس فلم کا مرکزی کردار ملعون سلمان رشدی کا تھا جس نے ایک گستاخانہ ناول لکھا تھا۔ اس کا کردار اداکار افضال احمد نے کیا تھا جسے فلم کے آخر میں قدرت کے عذاب کے طور پر آگ میں جلتے ہوئے دکھایا جاتا ہے جو ایک سفید جھوٹ تھا۔

اس فلم پر خوب جگ ہنسائی ہوئی تھی کیونکہ مسلم ممالک خصوصاَ پاکستان بھر میں پر تشدد ہنگاموں کی وجہ سے مذہبی جذبات بھڑکانے اور اشتعال دلانے والی اس فلم کے فوٹیج دنیا بھر کے میڈیا پر دکھائے گئے تھے۔ مذہبی انتہاپسندوں کے عالمی احتجاج نے اس ملعون کے اس انگلش ناول کو راتوں رات بیسٹ سیلر بنا دیا تھا جبکہ ہمارے حصہ میں جان و مال کا نقصان اور عالمی بدنامی آئی تھی۔

یہ ایک ڈبل ورژن پنجابی/اردو فلم تھی جس کے ایک کورس گیت "سید المرسلین ، رحمت الالعلمین ﷺ .." میں منیر حسین کی آواز دونوں ورژن کے گیتوں میں تھی اور مسعودرانا کی آواز صرف اردو ورژن میں تھی جبکہ پنجابی ورژن میں ان کی جگہ اخلاق احمد کی آواز استعمال کی گئی تھی۔

فلم آن (1973) سے وابستہ حسین یادیں

منیر حسین اور مسعودرانا کے گائے ہوئے یادگار گیتوں میں سے ایک کورس گیت تھا جس میں رونا لیلیٰ کی آواز بھی تھی:

• سب ٹر گئے خان وڈیرے ، تیرا میرا دور آ گیا..

یہ گیت پنجابی فلم آن کا تھا جو 16 جنوری 1973ء کو عید الاضحیٰ کے مبارک دن ریلیز ہوئی تھی۔

جناب ذوالفقار علی بھٹو شہید کے عوامی دور کا یہ ایک انقلابی گیت تھا جس سے میرا ایک بڑا یادگار واقعہ منسلک ہے۔ میں اس وقت پانچویں جماعت کا طالب علم تھا اور ایک گھاگھ فلم بین بن چکا تھا۔ تقریباَ ہر ہفتے فلم دیکھنے کے علاوہ چار اخبار اور ایک فلمی رسالہ میرے زیر مطالعہ ہوتاتھا۔

میرے آبائی شہر کھاریاں میں اس وقت تین سینماگھر ہوتے تھے جو سبھی کینٹ کی حدود میں واقع تھے۔ ان میں قیصر سینما شہر کے قریب ترین تھا جو مرکزی سینما بھی تھا اورجس پر زیادہ تر نئی فلمیں ریلیز ہوتی تھیں۔ میرے بچپن کے پہلے دور کی زیادہ تر فلمیں اور یادیں اسی سینما سے وابستہ ہیں۔ دوسرا گیریژن سینما تھا جو کینٹ کے وسط میں تھا اور عام طور پر فوجی بھائیوں کے لیے مختص ہوتا تھا۔ تیسرا سازین سینما تھا جو صدر کے علاقے میں واقع تھا جہاں عام طور پر ایک ٹکٹ پر دو پرانی فلمیں دکھائی جاتی تھیں جن میں عموماَ پہلاشو اردو اور دوسرا شو پنجابی فلم کا ہوتا تھا۔

مجھے سازین سینما کی گیلری میں بیٹھ کر فلم دیکھنے کی بڑی خواہش ہوتی تھی کیونکہ قیصر سینما اس سے محروم تھا لیکن اس سینما پر فلمیں دیکھنے کا بہت کم موقع ملتا تھا۔ ایک تو میرے گھر سے بہت دور تھا ، دوسرا اس سینما پر صرف رات کو دو شو ہی ہوتے تھے اور رات کو گھر سے باہر نکلنے کی اجازت بھی نہیں ہوتی تھی۔

اس عید پر سازین سینما پر پہلی بار لاہور کے ساتھ ساتھ پنجابی فلم آن دکھائی جارہی تھی جو دیکھنے کی بڑی خواہش تھی۔ ان دنوں میرے والد صاحب مرحوم ڈنمارک سے چھٹیوں پر آئے ہوئے تھے اور ہم اپنا نیا مکان بنا رہے تھے جو وہ اپنی واپسی تک مکمل کروانا چاہتے تھے۔ کاریگر لوگوں کے بارے مشہور تھا کہ وہ جس گھر میں گھستے تھے ، وہاں سے اپنے وقت پر ہی نکلتے تھے۔

والد صاحب مرحوم بڑے قابل آدمی تھے ، لوگوں سے کام لینا خوب جانتے تھے۔ انھوں نے مستری مزدوروں سے دن رات کام کروایا اور اس کے عوض انھیں بہتر معاوضے کے علاوہ صبح ، دوپہر اور شام کا پرتکلف کھانا ، دن میں کئی بار چائے کے ادوار اور گپ شپ کے علاوہ اس عید پر بڑے شاہانہ انداز میں فلم بھی دکھائی گئی تھی۔ سالم تانگوں میں سینما پہنچائے گئے ، گیلری میں بیٹھ کر فلم دکھائی گئی ، وقفے کے دوران اشیائے خوردونوش سے تواضع کی گئی اور فلم کے خاتمے پر انھی تانگوں پر سب کو واپس گھروں میں بھی چھوڑا گیا تھا۔ ہمارے محلہ میں اس وقت کا سب سے عالی شان مکان جو یقیناَ کئی ماہ کا پروجیکٹ تھا لیکن والدصاحب مرحوم نے بڑی خوش اسلوبی سے صرف دو تین ہفتوں میں مکمل کروا لیا تھا۔

اس طرح میری دیرینہ خواہش بھی پوری ہو گئی تھی اور میں نے سازین سینما کی گیلری میں بیٹھ کر فلم آن ، بڑی آن بان اور شان کے ساتھ دیکھی تھی۔۔!