اداکار نرالا
لہری کے بعد کراچی کے
دوسرے مقبول ترین کامیڈین تھے

نرالا ، کراچی میں بننے والی اردو فلموں میں لہری صاحب کے بعد دوسرے مقبول ترین مزاحیہ اداکار تھے جو ساٹھ کے عشرہ میں بام عروج پر تھے..!

نرالا کا اصل نام مظفر حسین تھا اور ان کی پہلی فلم اور بھی غم ہیں (1960) تھی۔ ان کی سب سے بڑی فلم ارمان (1966) تھی جس میں ان کا کردار بڑا جاندار تھا۔ دیگر خاص خاص فلمیں ہیرا اور پتھر (1964) ، میرے بچے میری آنکھیں (1967) ، جہاں تم وہاں ہم (1968) ، نیند ہماری خواب تمہارے (1971) وغیرہ تھیں۔

فلم بنجارن )1962) میں نرالا صاحب پر دو کورس گیت فلمائے گئے تھے

• لچکے کمریا موری۔۔
• پٹ گھونگھٹ کے کھولے کھولے۔۔

ان دونوں کورس گیتوں میں مسعودرانا کے گائے ہوئے مکھڑے اور الاپ ان پر فلمائے گئے تھے ، اس طرح نرالا پہلے مزاحیہ اداکار تھے جن پر مسعودرانا کی آواز فلمائی گئی تھی جنھوں نے دیگر مزاحیہ اداکاروں کے لیے بھی بڑی تعداد میں گیت گائے تھے۔

فلم میرے بچے میری آنکھیں (1967) میں مسعودرانا کا گایا ہوا ایک بڑا دلکش سولو گیت نرالا پر فلمایا گیا تھا:

• میرا یار ہے ایسا یاروں میں ، جیسے ہو چاند ستاروں میں..

پاکستانی فلموں میں رنگیلا ، منورظریف ، لہری ، خلیفہ نذیر ، زلفی ، ننھا اور علی اعجاز کی موجودگی میں نرالا صاحب کو زیادہ پذیرائی نہیں ملی اور زیادہ تر فلموں میں ان کے کردار مختصر اور ثانوی ہوتے تھے۔

فلم بے ایمان (1973) میں نرالا ، قوی اور رنگیلا پر فلمایا ہوا یہ کورس گیت بڑا دلچسپ تھا:

• اللہ کے نام پہ جھولی بھر دے ، اللہ ہی دے گا..

اس گیت کے ذکر پر مجھے مسعودرانا مرحوم کی ڈائری کا وہ صفحہ یاد آ جاتا ہے جس پر انھوں نے یہ گیت بڑے سلیقے سے لکھا ہوا تھا کہ کونسا بول انھوں نے گانا تھا اور کون سے بول رشدی اور روشن گائیں گے۔ مجھے ان کی وہ ڈائری دیکھنے کا موقع تب ملا تھا جب اپریل 1996ء میں اپنے دورہ پاکستان کے دوران ان کے گھر اقبال ٹاؤن لاہور تعزیت کے لیے گیا تھا۔

نرالا پر مسعودرانا کا آخری گیت فلم نوابزادہ (1975) میں فلمایا گیا تھا:

• اک بچہ ، اکھیاں کا تارا ، دوجا بچہ ، دل کا سہارا ، تیجا ، چوتھا ، ایک مصیبت ، پنجوا ، نرا پواڑا..

خاندانی منصوبہ بندی کے بارے میں یہ ایک بڑا بامقصد اور پر اثر گیت تھا جس پر مجھے ایسا ہی ایک اور گیت یاد آ جاتا ہے:

• جے ہو گئے بہتے بال تے کتھوں کھاواں گے ، کجھ سوچو ، کرو خیال جے کتھوں کھاواں گے..

میرے دادا جان مرحوم جب کبھی موڈ میں ہوتے تھے تو ہم بچوں کو دیکھ کر یہ گیت گنگنانے لگتے تھے لیکن اس وقت مجھے معلوم نہیں تھا کہ اسے بھی مسعودرانا صاحب نے گایا تھا۔ جب فلمی گیتوں پر تحقیق کی تو حیرت ہوئی تھی کیونکہ ایک تو گائیکی بڑی با کمال تھی اور دوسرا اس گیت کی دھن مصلح الدین نے ترتیب دی تھی جو ایک بنگالی نژاد موسیقار تھے جنھوں نے کبھی کسی پنجابی فلم کی موسیقی ترتیب نہیں دی تھی۔