مظہرشاہ
پنجابی فلموں کے
ایک عہد ساز فنکار تھے

مظہرشاہ ، پنجابی فلموں کے ایک عہد ساز فنکار تھے۔۔!

پاکستان کے ابتدائی دور میں منفی کرداروں میں نظر آنے والے فنکاروں میں غلام محمد ، اجمل ، آغا سلیم رضا ، ہمالیہ والا ، علاؤالدین ، طالش ، الیاس کاشمیری اور ساون بڑے نامور اداکار تھے۔ مظہرشاہ ان سب میں منفرد اور ایک آئیڈیل ولن اداکار ثابت ہوئے تھے اور ساٹھ کی دھائی میں مقبولیت کی بلندیوں پر تھے۔

ایک بارعب شخصیت ، گرجدار آواز اور جارحانہ انداز جیسی جملہ خوبیوں کی بدولت وہ ایک بھاری بھر کم ولن کا نقشہ پیش کرتے تھے۔

بڑھک کے بادشاہ

انھوں نے بڑھک کا ایک ایسا انداز متعارف کروایا تھا جو ان کی مستقل پہچان بن گیا تھا اور انھیں "بڑھک کا بادشاہ" بھی کہا جاتا تھا۔ ان کی بیشتر بڑھکیں زبان زدعام ہو جاتی تھیں اور روزمرہ بول چال کا حصہ بن جاتی تھیں۔

یہ بڑھک عام طور پر ایک ایسا دعویٰ یا دھمکی ہوتی تھی جو انتہائی مبالغہ آرائی ، خودنمائی اور خود ستائی پر مبنی ہوتی تھی اور مقصد ، مخالف پر رعب ڈالنا ، اپنی طاقت کو بڑھا چڑھا کر پیش کرنا اور بغیر کچھ کیے ہی دشمن کو مغلوب کرنا ہوتا تھا یعنی مکمل طور پر ایک جعلی عکس ہوتا تھا۔

مظہرشاہ کی مشہور زمانہ بڑھکیں

• تیری لاش نوں وی مچھیاں ای کھان گیاں۔۔ (فلم موج میلہ 1963)
• جنیں ساڈے نال متھا لایا اے ادہدی ماں نے وی وین ای پائے نیں۔۔ (فلم پھنے خان 1965)
• میں ٹبر کھا جاں تے ڈکار نہ ماراں۔۔ (فلم دل دا جانی 1967)
• میں پٹھیاں ٹنگ دیاں گا۔۔ (فلم جاگیردار 1967)
• بندہ میں بڑا شکی مزاج آں۔۔ (فلم جانی دشمن 1967)
• میں اڈی مار کے دھرتی ہلا دین والا جوان آں۔۔ (فلم پگڑی سنبھال جٹا 1968)
• میں پسوڑی پا دیاں گا۔۔ (فلم وریام 1969)
• میرا ناں لے کے ماواں بال ڈراندیاں نیں۔۔ (فلم تہاڈی عزت دا سوال اے 1969)
• میں بندہ بڑا ڈنگا واں۔۔ (فلم دل دیاں لگیاں 1970)
• میرا غصہ خونی ہنیری اے۔۔ (فلم بابا دینا 1971)
• اوۓ میں اوکھا جٹ آں۔۔ (فلم حدبندی 1971)
• میری بڑھک سن کے انگریزاں بم بنایا سی۔۔ (فلم ؟؟)

مظہرشاہ کی مندرجہ بالا بڑھکوں میں

"میں ٹبر کھا جاں تے ڈکار نہ ماراں۔۔"

سب سے مقبول اور ذومعنی بڑھک تھی۔ اسے سن کر رنگیلا جو فلم میں مسٹر ہانگ کانگ کہلاتا ہے ، بڑی معصومیت سے کہتا ہے

"کم از کم ہانگ کانگ میں تو اتنا ہاضمہ کسی کا نہیں تھا۔۔"

بڑھک اور پاکستان کا قومی مزاج

ملنگی (1965)

جگری یار (1967)

جٹ دا قول (1971)

سر دا سائیں (1971)

ان بڑھکوں کے ایک مشاہدے سے یہ حقیقت بھی سامنے آتی ہے کہ ہماری فلموں میں بڑھک کا تعلق ہمارے قومی مزاج کے عین مطابق تھا۔ ہم جو کہتے ہیں ، وہ کرتے نہیں اور جو کرتے ہیں ، وہ مانتے نہیں۔

مظہرشاہ کی ان عوامی بڑھکوں کو زیادہ مقبولیت 1965ء کی جنگ کے بعد ملی تھی۔ اس جنگ کے دوران سرکاری دعوؤں پر جائیں تو کشمیر آزاد ہونے ہی والا تھا۔

ہماری ایک اداکارہ شمیم آراء نے تو اعلان کر دیا تھا کہ وہ شادی اس مجاہد سے کرے گی جو سری نگر پر پاکستانی پرچم لہرائے گا۔ افسوس ، اس کی یہ خواہش پوری نہ ہو سکی تھی اور آج بھی 1965ء کی جنگ کو یاد کرنے والے کشمیر کا ذکر گول کر جاتے ہیں اور ساری توجہ لاہور پر دشمن کی یلغار پر دیتے ہیں۔

اس کے علاوہ "بھٹو کی بڑھک" جو انھوں نے یو این او میں ماری تھی کہ

"ہم کشمیر کے لیے ہزار سال تک لڑیں گے۔۔"

ایک بہت بڑی بڑھک تھی کیونکہ دنیا جانتی ہے کہ پاکستان اپنے دستیاب وسائل سے ہزار سال تو دور کی بات ہے ، ہزار دن بھی نہیں لڑ سکتا۔

ہمارے ہاں ویسے بھی قوم کو اندھیرے میں رکھنے کے لیے جہاں غلط بیانی کی جاتی رہی ہے وہاں اپنی کامیابیوں کے لیے ہمیشہ سے بڑھکیں ہی ماری گئی ہیں جنھیں عوام الناس سنجیدگی سے نہیں لیتے۔ ہماری فلمیں بھی معروضی حالات کا ایک عکس ہوتی تھیں اور عوامی کرداروں ، فلمی گیتوں اور ذومعنی جملوں اور مکالموں کی صورت میں عمومی عوامی جذبات کی ترجمانی کیا کرتی تھیں۔

مظہرشاہ کا پس منظر

مظہرشاہ کا اصل نام سید منور حسین شاہ تھا۔ 1923ء میں لاہور میں پیدا ہوئے اور ایک پولیس ملازم تھے۔ اداکاری کے شوق میں فلمی دنیا میں آئے اور تین عشروں کے فلمی کیرئر میں دو سو کے قریب فلموں میں کام کیا جن میں سے دو درجن اردو اور باقی سبھی پنجابی فلمیں تھیں۔

مظہرشاہ کی پہلی فلم بے گناہ (1958) تھی۔ کامیابی کے لیے زیادہ انتظار نہیں کرنا پڑا اور 1960ء کی فلموں بہروپیا اور رانی خان نے پنجابی فلموں کی ضرورت بنا دیا تھا۔

مظہرشاہ کی جوڑی خاص طور پر اکمل اور سدھیر کے ساتھ زیادہ مقبول ہوئی تھی۔

مظہرشاہ کی خاص خاص فلمیں

مفت بر (1961) ، چوہدری (1962) ، موج میلہ ، چوڑیاں ، چاچا خوامخواہ (1963) ، ڈاچی ، ہتھ جوڑی ، فرنگی ، غدار (1964) ، پھنے خان ، من موجی ، جیدار ، ملنگی (1965) ، منہ زور ، نظام لوہار ، بانکی نار ، ابا جی (1966) ، جگری یار ، یار مار ، چاچا جی ، دل دا جانی ، اکبرا ، جانی دشمن ، مرزا جٹ (1967) ، بابل دا ویڑا ، پگڑی سنبھال جٹا ، سسی پنوں ، باؤ جی ، سجن پیارا (1968) ، وریام ، دلاں دے سودے ، شیراں دی جوڑی ، جند جان ، مکھڑا چن ورگا ، جنٹر مین ، شیراں دے پتر شیر (1969) ، انورا ، ماں پتر (1970) ، جی اور جٹا (1971) وغیرہ۔۔

مظہرشاہ پر فلمائے ہوئے گیت

ہماری فلموں میں عام طور پر ولن اداکاروں پر گیت نہیں فلمائے جاتے تھے لیکن مظہرشاہ پر ایک درجن سے زائد گیت فلمائے گئے تھے جن میں سے بیشتر گیت مسعودرانا کے گائے ہوئے تھے۔

پہلا گیت فلم ڈولی (1965) میں ایک دوہا تھا جو مظہرشاہ اور طالش کے پس منظر میں فلمایا گیا تھا

• ہتھی کیتا اے تینوں وداع دھیئے۔۔

دوسرا گیت

• دھیاں دتیاں تے کیوں نہ دتا مال مالکا۔۔

بھی ایک پس منظر گیت تھا جو فلم بابل دا ویڑا (1968) میں تھا۔ فلم دلدار (1969) میں مسعودرانا اور مالا کا ایک دوگانا

• میں بندہ آں نواب ، کھلا ڈھلا اے حساب۔۔

مظہرشاہ اور چھم چھم پر فلمایا گیا تھا۔ اسی سال کی فلم شیراں دی جوڑی میں مسعودرانا کا ایک کورس گیت تھا

• تیرا مکھ جے نہ ویکھاں ، چین آندا نئیں۔۔

یہ گیت زلفی پر فلمایا گیا تھا لیکن چند بول مظہرشاہ پر فلمائے گئے تھے جو حامد علی بیلا کی آواز میں تھے۔ فلم لارالپا (1970) میں مسعودرانا اور مالا کا گایا ہوا ایک رومانٹک گیت

• اج گیت خوشی دے گاواں۔۔

بھی مظہرشاہ کے ساتھ ناصرہ پر فلمایا گیا تھا۔ اس فلم میں وہ اعجاز کے بعد سیکنڈ ہیرو تھے۔ یاد رہے کہ مظہرشاہ کی بطور روایتی ہیرو اکلوتی فلم محرم دال دا (1970) تھی جس میں ان کی جوڑی رانی کے ساتھ تھی اور اس فلم میں میڈم نورجہاں کا یہ گیت

• کی میں حال سناواں دل دا ، کوئی محرم راز نئیں ملدا۔۔

ایک سپر ہٹ گیت تھا لیکن فلم بینوں نے مظہرشاہ کو ہیرو کے طور پر قبول نہیں کیا تھا۔ فلم باغی تے فرنگی (1976) میں مسعودرانا کا اخلاق احمد اور ساتھیوں کے ساتھ گایا ہوا ایک کورس گیت تھا

• جی کردا ، سجنوں تے بیلیو۔۔

یہ گیت چار بڑے فنکاروں پر فلمایا گیا تھا جن میں سے ایک مظہرشاہ بھی تھے۔

مظہرشاہ پر مسعودرانا کا جو آخری گیت فلمایا گیا تھا وہ فلم بکا راٹھ (1979) میں تھا جس کے بول تھے

• تیری پھانسی توں نئیں ڈرنا ، میں تے اللہ ہی اللہ کرنا۔۔

یہ گیت مصطفیٰ قریشی پر بھی فلمایا گیا تھا۔ یہ ایک بڑے کمال کا کورس گیت تھا اور اسی سال ریلیز ہوا تھا جب پاکستانی تاریخ کے واحد عوامی لیڈر جناب ذوالفقار علی بھٹو کو پھانسی دی گئی تھی جسے دنیا بھر میں ایک عدالتی قتل تسلیم کیا گیا ہے۔

مظہرشاہ کی آخری فلم روگی (1989) تھی اور اسی سال ان کا انتقال ہو گیا تھا۔