اسدبخاری
نے ہیرو سے آغاز کیا لیکن
ولن کے طور پر کامیابی ملی

اداکار ، فلمساز اور ہدایتکار اسدبخاری کا 86 برس کی عمر میں 14 اپریل 2020ء کو لاہور میں انتقال ہو گیا۔ (انا للہ وانا الیہ راجعون)

اسدبخاری کی پہلی فلم بے گناہ (1958) بتائی جاتی ہے لیکن ان کی پہچان دوسری فلم ثریا (1961) سے ہوئی تھی جس میں انھوں نے نیر سلطانہ کے شوہر کا کردار کیا تھا۔

اسدبخاری بطور ہیرو

اپنے ابتدائی دور میں انھیں مثبت کرداروں میں کاسٹ کیا جاتا تھا اور بطورسولوہیرو ان کی واحد کامیاب فلم میرا کیا قصور (1962) تھی جبکہ دیگر فلمیں جمالو (1962) ، داماد ، کالا آدمی (1963) ، اک پردیسی اک مٹیار ، لنڈا بازار (1964) ، لال رومال ، چوکیدار (1965) ، گوانڈی ، مسٹر اللہ دتہ ، معجزہ (1966) ، چن جی (1967) اور کڑمائی (1968) تھیں۔

اس دوران سائیڈ ہیرو کے طور پر ان کی متعدد کامیاب فلمیں اور بھی تھیں جن میں مہتاب (1962) ، بھرجائی ، میرا ماہی (1964) ، آئینہ (1966) وغیر اہم فلمیں تھیں۔

بطور ہیرو اسدبخاری پر مسعودرانا کا پہلا گیت ایک قوالی کی صورت میں عید کے دن ریلیز ہونے والی فلم مسٹر اللہ دتہ (1966) میں فلمایا گیا تھا:

بطور ہیرو اسدبخاری کی فلم لنڈا بازار (1964)

• ایتھے جڑدے نیں نویں نویں رشتے تے پچھلے یارانے بھلدے..

جبکہ اسی دن ریلیز ہونے والی ایک اورفلم گوانڈی میں اسدبخاری کے پس منظر میں مسعودرانا کے یہ دلسوز بول فلمائے گئے تھے:

• آ شہیدا ، جی آیاں نوں ، گلیاں نین وچھائے ، تیرے آن دی آس تے سجناں ، اتھرو اساں سکائے..

اسدبخاری پر مسعودرانا کا پہلا سولو گیت فلم چن جی (1967) میں فلمایا گیا تھا جس کے بول تھے:

• دھرتی دا میں سینہ پھولاں ، کدی نہ ڈھولاں بیلیا..

اسدبخاری بطور ولن

اپنے ولن کے دور میں بھی وہ متعدد فلموں میں بطور ہیرو نظر آئے تھے جن میں سب سے کامیاب فلم خانزادہ (1975) تھی جس کا انھوں نے ٹائٹل رول کیا تھا اور اس فلم میں بھی ان پر مسعودرانا کا یہ سپر ہٹ گیت فلمایا گیا تھا:

• رس کے ٹر پیے او سرکار، توڑ کے میرا سجرا پیار..

اسدبخاری کو اصل کامیابی پنجابی فلموں کے ولن کے طور پر ملی تھی اور یہ کامیابی انھوں نے اس دور میں حاصل کی تھی جب پنجابی فلموں پر مظہرشاہ ، ساون اور الیاس کاشمیری جیسے ہیوی ویٹ ولن اداکاروں کا راج تھا۔

بخاری صاحب ، بھٹی برادران کی فلموں کا لازمی حصہ ہوتے تھے اور بطور ولن ان کی فلموں کی ایک بہت بڑی تعداد ہے۔

• اسدبخاری کی فلموں کا ریکارڈ ملاحظہ فرمائیں

اسدبخاری بطور فلمساز اور ہدایتکار

اسدبخاری نے بطور فلمساز اور ہدایتکار پانچ فلمیں بنائی تھیں جن میں بطور فلمساز فلم دلاں دے سودے (1969) ایک سپر ہٹ فلم تھی جوپاکستان کی پہلی سپر ہٹ اردو فلم دو آنسو (1950) کا ری میک تھی۔

اس فلم میں ملکہ ترنم نورجہاں کی مشہور زمانہ دھمال

• لال میری پت رکھیوبلا جھولے لالن۔۔

نے مقبولیت کے نئے ریکارڈز قائم کیے تھے۔ مجھے ذاتی طور پر اس دھمال کو ایک مجرے کے طور پر دیکھ کر افسوس ہوا تھا۔ اس فلم میں وقت کی دو سپر سٹارز فلم ہیروئنیں ، نغمہ اور فردوس شامل تھی اور بتایا جاتا ہے کہ دونوں میں اس مشہور زمانہ دھمال کی فلمبندی پر ٹھن گئی تھی اور اسی لیے فلمساز نے دونوں کو راضی رکھا تھا۔ اعجاز اس فلم کے روایتی ہیرو تھے جن پر مسعودرانا کا گایا ہوا یہ سپر ہٹ گیت فلمایا گیا تھا:

• بھل جان اے سب غم دنیا دے ، جنھوں پیار کراں ، جے او نال ہووے..

بطور فلمساز اور ہدایتکار اسدبخاری کی پہلی فلم آسو بلا (1971) تھی جو اپنی دو قلندری دھمالوں

• حسینی لال قلندر۔۔
• اسیں آں قلندری دیوانے لج پال دے۔۔

کی وجہ سے بے حد کامیاب ہوئی تھی۔ اس فلم میں ان کی ہیروئن عالیہ تھی۔ میرے ذہن پر آج بھی اس فلم کے راولپنڈی کے ناولٹی سینما میں مسلسل 22 ہفتے چلنے کا اخباری اشتہار تازہ ہے۔

اسدبخاری کی دوسری فلم میں اکیلا (1972) تھی جس میں مسعودرانا کا گایا ہوا یہ تھیم سانگ سپر ہٹ ہوا تھاَ:

• منزل ہے نہ ہمدم ہے،کچھ ہے تو اگر دم ہی دم ہے ، میں اس دنیا میں اکیلا ہوں..

یہی گیت پھر سلو موشن میں مالا اور مسعودرانا نے گایا تھا جو فلم میں اسدبخاری اور ان کی اداکارہ بیگم عابدہ پر فلمایا گیا تھا۔ اس فلم میں مشہورزمانہ دھمال "لال میری پت رکھیو بلا۔۔" کو ایک قوالی کے انداز میں پیش کیا گیا تھا جسے مسعودرانا کے ساتھ عنایت حسین بھٹی اور ساتھیوں نے بڑی خوبصورتی سے گایا تھا اور یہ قوالی فلم میں موسیقار جوڑی بخشی وزیر صاحبان پر فلمائی گئی تھی۔

اسدبخاری کی بطور فلمساز اور ہیرو پہلی فلم لنڈا بازار (1964) کوفلم اج دی گل (1975) کی صورت میں دوبارہ بنایا گیا تھا جس میں مسعودرانا کی ایک دھمال جو اداکار ابو شاہ اور ساتھیوں کے علاوہ اسدبخاری ، دیبا اور آسیہ کے پس منظر میں فلمائی گئی تھی:

• اک تارا بولے علیؑ علیؑ ، جگ سارا بولے علیؑ علیؑ..

اس فلم کا ایک اور گیت جو مسعودرانا ہی کی آواز میں تھا اور اسدبخاری پر فلمایا گیاتھا:

• ٹھنڈیاں ٹھار گنڈیریاں، میں کٹ کٹ لایاں ڈھیریاں..

ان کے علاوہ بطور فلمساز ان دیگر فلمیں بلا چیمپئن (1973) ، بلا ببر شیر (1976) اور کفارہ (1986) تھیں۔

اسدبخاری کا اصل نام سید اعجاز الحسن بخاری تھا اور وہ 1934 میں گکھڑ ضلع گوجرانوالہ میں پیدا ہوئے تھے۔