شباب کیرانوی

پاکستان کی فلمی تاریخ کو جن فنکاروں پر بجا طور پر ناز ہے ان میں ایک بہت بڑا نام فلمساز ، ہدایتکار ، مصنف ، نغمہ نگار اور سٹوڈیو اونر شباب کیرانوی کا تھا جنھوں نے اپنی آل راؤنڈ کارکردگی سے فلم بینوں پر بڑے گہرے اثرات مرتب کیے تھے۔۔!

شباب کیرانوی کا فلمی کیرئر

پاکستان فلم میگزین پر موجود اعدادوشمار کے مطابق شباب کیرانوی ، 39 فلموں کے ہدایتکار ، 23 فلموں کے فلمساز ، 63 فلموں کے مصنف اور 76 فلمی گیتوں کے شاعر تھے۔ انھوں نے کبھی کسی پنجابی فلم کی ڈائریکشن نہیں دی تھی لیکن پانچ فلموں کی کہانیاں لکھنے کے علاوہ چار فلموں کے فلمساز بھی تھے۔

ان کے دونوں باصلاحیت ہدایتکار بیٹوں ظفر شباب نے 29 اور نذر شباب نے 25 فلموں کی ڈائریکشن دی تھی۔ عام طور پر اپنے بیٹوں کی فلموں کے فلمساز اور مصنف خود شباب صاحب ہی ہوتے تھے۔

جلن (1955)

ثریا (1961)

مہتاب (1962)

شباب کیرانوی نے اپنے فلمی کیرئر کا آغاز ایک فلمی رسالے ڈائریکٹر کے ایڈیٹر کے طور پر کیا تھا۔

شباب کیرانوی بطور فلمساز

بطور فلمساز ان کی پہلی فلم جلن (1955) تھی جس میں اس وقت کے مقبول گلوکار عنایت حسین بھٹی کو بطور ہیرو کاسٹ کیا گیا تھا جبکہ نادرہ نامی ایک گمنام اداکارہ ہیروئن تھی۔ اس فلم کی کہانی بھی شباب صاحب ہی کی لکھی ہوئی تھی اور مکالمے سعادت حسن منٹو کے لکھے ہوئے تھے۔ اس فلم کے بیشتر گیت بھی شباب کیرانوی نے خود لکھے ہوئے تھے۔

بطور فلمساز ان کی خاص خاص فلموں میں ٹھنڈی سڑک (1956) ، گلبدن (1960) ، سپیرن (1961) ، چوہدری (1962) ، تیس مار خان (1963) ، سنگدل (1968) ، درد (1969) ، سجن بیلی (1970) ، رنگیلا اور منورظرف (1973) ، محبت ایک کہانی ، شمع محبت (1977) ، سہیلی ، انمول محبت (1978) ، وعدے کی زنجیر ، دوراستے (1979) ، لاجواب ، اور یہ زمانہ اور ہے (1981) شامل ہیں۔

شباب کیرانوی بطور ہدایتکار

انسان اور آدمی (1970)

انصاف اور قانون (1971)

میرا نام ہے محبت (1975)

بطور ہدایتکار شباب کیرانوی کی پہلی فلم ثریا (1961) تھی جس میں انھوں نے اسدبخاری کو پہلی بار بطور ہیرو متعارف کرایا تھا۔

سپر ہٹ فلم مہتاب (1962) سے بریک تھرو ملا تھا۔ اس فلم کی سب سے اہم بات تو احمدرشدی کا ایک سٹریٹ سانگ تھا "گول گپے والا آیا۔۔" جسے پنجابی فلموں کے عظیم شاعر حزیں قادری نے لکھا تھا۔ اسی فلم کی کہانی پر ان کے صاحبزادے نذر شباب نے فلم شمع (1974) بنائی تھی جس کے اہم کرداروں محمدعلی ، دیبا ، وحیدمراد ، بابرہ شریف ، ندیم ، زیبا اور تمنا کو فلم مہتاب (1962) میں بالترتیب علاؤالدین ، نیرسلطانہ ، حبیب ، رخسانہ ، اسدبخاری ، نغمہ اور زینت نے ادا کیا تھا۔ بتایا جاتا ہے کہ فلم مہتاب (1962) کی کمائی سے شباب سٹوڈیو کا قیام عمل میں آیا تھا۔

شباب کیرانوی کی بطور ہدایتکار کامیاب اور معیاری فلموں کی ایک لمبی فہرست ہے۔ خاص خاص فلموں میں مہتاب (1962) ، ماں کے آنسو (1963) ، آئینہ (1966) ، انسانیت (1967) ، انسان اور آدمی (1970) ، انصاف اور قانون (1971) ، افسانہ زندگی کا (1972) ، من کی جیت (1972) ، پردے میں رہنے دو ،دامن اور چنگاری (1973) ، آئینہ اور صورت (1974) ، میرا نام ہے محبت (1975) ، نشیمن (1976) ، شمع محبت (1977) ، سہیلی ، انمول محبت (1978) ، لاجواب ، اور یہ زمانہ اور ہے (1981) وغیرہ شامل تھیں۔

شباب کیرانوی بطور نغمہ نگار

بطور نغمہ نگار شباب کیرانوی کے سپر ہٹ گیتوں میں سے "محبت میں سارا جہاں جل گیا ہے۔۔" (مالا ، فلم انسانیت 1967) ، تیری محفل سے یہ دیوانہ چلا جائے گا۔۔" (مہدی حسن فلم درد 1969) اور "تو جہاں کہیں بھی جائے ، میرا پیار یاد رکھنا۔۔" (نورجہاں ، مہدی حسن ، فلم انسان اور آدمی 1970) قابل ذکر ہیں۔ ان کے لکھے ہوئے زیادہ تر گیت آئرن پروین نے گائے تھے۔

شباب کیرانوی اور مسعودرانا کے گیت

ہدایتکار شباب کیرانوی ، اپنے ہدایتکار بیٹوں
ظفر اور نذر شباب کے ساتھ

مسعودرانا کے ساتھ شباب کیرانوی کی پہلی فلم فیشن (1965) تھی جس میں ان کے دو تھیم سانگ تھے۔

فلم آئینہ (1966) ان دونوں کی سب سے بڑی نغماتی فلم تھی جس کے گیت "تمہی ہو محبوب میرے ، میں کیوں نہ تمہیں پیار کروں۔۔" نے مقبولیت کے تمام اگلے پچھلے ریکارڈ توڑ دیے تھے۔ دلچسپ اتفاق دیکھیے کہ اس گیت کے بولوں پر شباب صاحب نے ایک اور فلم تمہی ہو محبوب میرے (1969) بنائی تھی۔ اس فلم میں بھی مسعودرانا کا گیت "فسانہ دل ہے مختصر سا کہ آگ دل میں بھڑک اٹھی ہے۔۔" بھی اتنا مقبول ہوا تھا کہ اس کے بول پر بھی شباب صاحب نے فلم فسانہ دل (1970) بنائی تھی۔

مسعودرانا نے شباب کیرانوی اور ان کے دونوں بیٹوں ظفر شباب اور نذر شباب کی کل 17 فلموں میں 26 گیت گائے تھے۔ مسعودرانا کا شباب کیرانوی کے ساتھ نو فلموں میں ساتھ رہا تھا جن میں آخری فلم دامن اور چنگاری (1973) تھی۔ ظفر شباب کی صرف دو فلموں کے لیے نغمہ سرائی کی تھی جن میں پہلی فلم سنگدل (1968) اور آخری فلم سچا جھوٹا (1974) تھی جبکہ انھوں نے دوسرے صاحبزادے نذر شباب کی چھ فلموں میں گیت گائے تھے جن میں پہلی فلم سجن بیلی (1970) اور آخری فلم تیری میری اک مرضی (1984) تھی۔ ان کے علاوہ مسعودرانا نے شباب کیرانوی کے لکھے ہوئے مندرجہ ذیل تین گیت بھی گائے تھے:

• تم مجھے اپنی محبت دے دو ، دل میں رہنے کی اجازت دے دو۔۔ (فلم الف لیلیٰ 1968)
• محبت کا وعدہ ہمیشہ نبھانا ، نہ آنکھیں چرانا ، نہ دامن چھڑانا۔۔ (فلم شاہی محل 1968)
• یہ وعدہ کیا تھا محبت کریں گے ، سدا ایک دوجے کے دل میں رہیں گے۔۔ (فلم دامن اور چنگاری 1973)

یہ آخری گیت ایک دوگانے کی صورت میں مسرور انور نے لکھا تھا لیکن اسی استھائی پر شباب صاحب نے یہ المیہ گیت لکھ دیا تھا۔ اس سے قبل مسعودرانا فلم نائیلہ (1965) میں ایسا ہی ایک گیت "دور ویرانے میں ایک شمع ہے روشن کب سے۔۔" گا چکے تھے جو حمایت علی شاعر نے لکھا تھا لیکن اس کا المیہ ورژن قتیل شفائی نے لکھا تھا۔

شباب کیرانوی کی دریافتیں

شباب کیرانوی کی فلمیں بہت سے نامور فنکاروں کے لیے اہم سنگ میل ثابت ہوئی تھیں جن کی ایک فہرست اس طرح سے تھی:

• عنایت حسین بھٹی کی بطور ہیرو پہلی فلم جلن (1955) تھی۔
• کمال کی پہلی فلم ٹھنڈی سڑک (1957) تھی۔
• احمدرشدی کو بریک تھرو فلم سپیرن (1961) سے ملا تھا۔
• اسدبخاری فلم ثریا (1961) میں پہلی بار ہیرو کے روپ میں نظر آئے تھے۔
• نغمہ کی بطور ہیروئن پہلی فلم چوہدری (1962) تھی۔
• شیریں کی پہلی فلم تیس مار خان (1963) تھی۔ اسی فلم میں پہلی بار علاؤالدین کو سولو ہیرو کے طور پر پیش کیا گیا تھا۔
• ننھا کی پہلی فلم وطن کا سپاہی (1966) تھی۔
• علی اعجاز کی پہلی فلم انسانیت (1967) تھی۔
• ندیم کی موجودہ پاکستان کی پہلی فلم سنگدل (1968) تھی۔ اسی فلم میں ظفر شباب ، مسعوداختر ، صاعقہ اور زرقا کو پہلی بار متعارف کرایا گیا تھا۔
• فلم سجن بیلی (1970) میں نذر شباب اور احمد مٹھو کو متعارف کرایا گیا تھا۔
• آسیہ کو فلم انسان اور آدمی (1970) میں متعارف کرایا گیا تھا۔
• غلام محی الدین کی اکلوتی کامیاب اردو فلم میرا نام ہے محبت (1975) تھی۔
• اسد امانت علی خان نے پہلی بار فلم سہیلی (1978) میں نغمہ سرائی کی تھی۔
• اداکارہ انجمن کی بطور ہیروئن پہلی فلم وعدے کی زنجیر (1979) تھی۔

شباب کیرانوی کی یادگار نغماتی فلم آئینہ (1966) کا ایک اخباری اشتہار