نسیم بیگم کو نورجہاں ثانی بھی کہا جاتا تھا

ساٹھ کی دھائی ، پاکستان کی فلمی تاریخ کا سب سے سنہرا دور تھا جب ہر شعبہ میں اعلیٰ پائے کے فنکار موجود تھے۔ خصوصاَ فلمی موسیقی میں بڑا زبردست کام ہوا تھا اور بڑے بڑے سپر ہٹ گیت تخلیق ہوئے تھے۔

اس دور کے موسیقار ، نغمہ نگار اور گلوکار ، پاکستان کی فلمی تاریخ کے ہیوی ویٹ کردار رہے ہیں جن کا کبھی کوئی ثانی نہیں رہا۔ ایسے ہی بڑے ناموں میں ایک بہت بڑا نام ، گلوکارہ نسیم بیگم کا تھا جسے "نورجہاں ثانی" بھی کہا جاتا تھا۔

نسیم بیگم کا زندگی بھر ہر ہفتے ایک گیت

"اے راہ حق کے شہیدو۔۔" اور "ویر میرا گھوڑی چڑھیا۔۔" جیسے لافانی گیت گانے والی اس عظیم گلوکارہ نے صرف چودہ سالہ فلمی کیرئر میں ساڑھے تین سو سے زائد فلموں میں ساڑھے سات سو کے لگ بھگ فلمی گیت گائے تھے۔ یہ سالانہ پچیس فلموں اور پچاس سے زائد فلمی گیتوں کی اوسط بنتی ہے۔ گویا مسلسل چودہ برس تک تقریباَ ہر ہفتے اس کا ایک گیت ریلیز ہوتا تھا جس سے اس کی مقبولیت اور مصروفیت اور پاکستان کی فلم انڈسٹری کے عروج کا اندازہ لگایا جا سکتا ہے۔

نسیم بیگم کے فلمی گیتوں پر ایک تفصیلی مضمون پاکستان فلم میگزین کے سابقہ ورژن میں لکھا جا چکا ہے جو ایک گرافک ورژن میں تھا ، ان شاء اللہ ، جب کبھی موقع ملا تو سابقہ ویب سائٹ سے تمام اردو مضامین کو یونی کوڈ ورژن میں پیش کروں گا تاکہ موبائل ورژن میں بھی مستقل اہمیت کے حامل یہ معلوماتی مضامین آسانی سے پڑھے جا سکیں۔

نسیم بیگم اور مسعودرانا کا ساتھ

نسیم بیگم اور مسعودرانا ، ایک گیت کی ریکارڈنگ کے دوران

سر سنگیت اور راگ راگنیوں پر مکمل عبور رکھنے والی عظیم گلوکارہ نسیم بیگم نے اردو اور پنجابی فلموں میں یکساں تعداد میں گیت گائے تھے۔

اس نے سب سے زیادہ مردانہ دوگانے مسعودرانا کے ساتھ گائے تھے جن کی تعداد دودرجن سے زائد ہے۔ آئرن پروین کے ساتھ پچاس سے زائد اور مالا کے ساتھ تین درجن سے زائد دوگانوں کے علاوہ نسیم بیگم نے بابا چشتی کی دھنوں اور حزیں قادری کے لکھے ہوئے گیتوں کی سنچریاں بھی بنائی تھیں۔

نسیم بیگم کے سب سے زیادہ گیت فردوس ، نغمہ اور نیلو پر فلمائے گئے تھے جو اس عشرہ میں خصوصاَ پنجابی فلموں کی سپر سٹارز تھیں۔

نسیم بیگم نے مسعودرانا کے ساتھ پہلا دوگانا فلم بھرجائی (1964) میں گایا تھا۔

دے گا نہ کوئی سہارا

ان دونوں کے دودرجن سے زائد اردو ، پنجابی دوگانوں میں سے میرے لیے سب سے یادگار گیت فلم کون کسی کا (1966) تھا:

• دے گا نہ کوئی سہارا ، ان بے درد فضاؤں میں ، سو جا غم کی چھاؤں میں..

نسیم بیگم اور صدر ایوب خان

معروف شاعر حبیب جالب کے لکھے ہوئے اس گیت کی دھن منظور اشرف نے بنائی تھی اور اس گیت کو نسیم بیگم نے اکیلے بھی گایا تھا لیکن مقبولیت مسعودرانا کے ساتھ گائے ہوئے دوگانے کو ملی تھی جو اکثر ریڈیو پر بجتا تھا۔

میں جب بھی یہ گیت سنتا تھا تو میرے لیے وقت رک سا جاتا تھا۔ اصل میں یہ پہلا پہلا فلمی گیت ہے جو میری یادداشت میں محفوظ ہے۔

میری والدہ محترمہ ایک بہن بھائی کی کہانی سنایا کرتی تھیں جو بچپن میں بچھڑ جاتے ہیں اور بڑے ہو کر اس گیت کے گانے سے مل جاتے ہیں۔

فلم کون کسی کا (1966) کی کہانی کا یہ خلاصہ میرے والد صاحب مرحوم نے انھیں سنایا ہو گا جنھوں نے اس دور میں کبھی فلم یا سینما کا منہ تک نہ دیکھا تھا۔ یہ واحد کہانی تھی جو والدہ صاحبہ سنایا کرتی تھیں ، باقی کام دادی جان مرحومہ کا ہوتا تھا جو نسل در نسل اور سینہ بہ سینہ سنی سنائی کہانیاں سنایا کرتی تھیں۔

آج یہ عالم ہے کہ ، اتفاق سے اس وقت ، جب میں یہ مضمون تحریر کر رہا ہوں ، میری والدہ محترمہ دوسرے صوفہ پر لیٹی ہیں ، ہاتھ میں ریموٹ کنٹرول ہے اور ٹی وی پر اپنی مرضی کا چینل لگا کر اپنی پسند کا ٹی وی ڈرامہ دیکھ رہی ہیں۔ شام کو جب بڑے ٹی وی چینلوں پر بڑی ڈرامہ سیریلز چلتی ہیں تو انھیں یاد ہوتا ہے کہ کس چینل پر کون سا ڈرامہ چل رہا ہے ، اس کی کتنی قسطیں دیکھ چکی ہیں اور کہانیاں کہاں تک پہنچی ہیں۔ صرف یہی نہیں بلکہ جب ٹی وی بور کر رہا ہو تو یو ٹیوب زندہ باد۔۔!

ان کے اس شوق کی خاطر میں نے کرونا وائرس کی جبری چھٹیوں میں یہ بھی سیکھ لیا ہے کہ کس طرح سے اپنے سمارٹ فون سے یو ٹیوب ویڈیو اپنے سمارٹ ٹی وی پر دیکھ سکتا ہوں۔ میرے بچے ، جو ماشاء اللہ ، اب سبھی جوان ہیں ، میرا مذاق اڑاتے ہیں کہ ابو نے ساری زندگی ڈرامے نہیں دیکھے لیکن لاک ڈاؤن نے انھیں اس طرف لگا دیا ہے۔ حالانکہ حقیقت یہ ہے کہ یہ کام صرف میں اپنی والدہ صاحبہ کے لیے کرتا ہوں ، جو نہ کوئی ٹی وی ڈرامہ چھوڑتی ہیں اور نہ ہی کوئی فرض یا نفل نماز۔۔!

نسیم بیگم اور مسعودرانا کے مقابلے کے گیت

نسیم بیگم کے مسعودرانا کے ساتھ دوگانوں کے علاوہ چار مقابلے کے گیت بھی گائے تھے ، یعنی ایک ایسا گیت ، جسے دو گلوکار الگ الگ گاتے ہیں۔ اتفاق سے ایسے گیتوں میں بھی مسعودرانا کو اپنے ساتھی گلوکاروں پر برتری حاصل رہی ہے۔ مندرجہ بالا گیت کے علاوہ ان کا دوسرا ایسا گیت تھا:

• کلا بندہ ہووے پاویں کلا رکھ نی ، دوواں کلیاں نوں ہوندا بڑا دکھ نی ، تو کلی کلی کتھے چلی ایں۔۔

اپنے وقت کا یہ ایک سپر ہٹ گیت تھا جو فلم چاچا جی (1967) کے لیے گایا گیا تھا۔ بابا چشتی کی دھن پر حزیں قادری کے بول تھے جو اکمل اور فردوس پر فلمائے گئے تھے۔ نسیم بیگم اور مسعودرانا کا تیسرا ایسا گیت فلم جنٹرمین (1969) میں تھا:

• اپنا بنا کے ، دل لاکے ، نس جاویں نہ ، میرے ہانیا۔۔

نسیم بیگم نے اس گیت کو شوخ انداز میں گایا تھا جو فردوس پر فلمایا گیا تھا لیکن اس گیت کو مسعودرانا کی آواز میں لازوال شہرت ملی تھی۔ حبیب پر فلمائے ہوئے اس گیت کا ویڈیو بھی مثالی تھا۔ خواجہ پرویز کے سادہ سے بول اور نذیر علی کی مدھر دھن ، ایک شاہکار گیت بن گئی تھی۔

ان دونوں عظیم گلوکاروں کا آخری مقابلے کا گیت فلم یہ راستے ہیں پیار کے (1970) میں تھا:

• زمانے میں رہ کے ، رہے ہم اکیلے ، ہمیں راس آئے نہ ، دنیا کے میلے

اعظم بیگ نامی موسیقار کی دھن میں مشیر کاظمی کا لکھا ہوا یہ بے مثل گیت مسعودرانا کے ٹاپ ٹین گیتوں میں سے ایک رہا ہے جسے نسیم بیگم کی آواز میں محض خانہ پری کے لیے ریکارڈ کیا گیا تھا۔

فلمی گیتوں کے گہرے مشاہدے سے یہ حقیقت بھی سامنے آتی ہے کہ سر سنگیت اور راگ راگنیوں پر مکمل عبور رکھنے والے فنکار ضروری نہیں کہ فلموں میں بھی کامیاب رہیں۔

فلمی گائیکی میں زیادہ اہمیت ، خوبصورت اور لچکدار آواز کی ہوتی تھی جسے موسیقار ہر رنگ میں ڈھال سکتے تھے۔ خود موسیقار ، فن موسیقی کی تمام باریکیوں کا ماہر ہوتا تھا اور وہ کسی ایسے گانے والے کا انتخاب نہیں کرتا تھا جو اس کے گیت کا بیڑا غرق کر دے۔ یہی وجہ ہے کہ فلمی گائیکی میں محمدرفیع اور مسعودرانا جیسے کئی عطائی گویے ، پیشہ ور گانے والوں سے زیادہ کامیاب رہے ہیں۔

Masood Rana & Naseem Begum:

0 joint Online films

Masood Rana & Naseem Begum:

Total 127 joint films