سعید گیلانی

نامور فلمی شاعر سعیدگیلانی کا 5 اپریل 2021ء کو انتقال ہو گیا۔۔!

سعیدگیلانی کو یہ منفرد اعزاز حاصل ہے کہ پہلی ہی فلم دل اور دنیا (1971) میں لکھا ہوا پہلا ہی گیت "چمپا اور چنبیلی ، یہ کلیاں نئی نویلی ، تحفہ پھولوں کا یہ انمول ، لیتے جانا بابو جی بن مول۔۔" سپرہٹ ہوا تھا۔ موسیقار کمال احمد نے یہ گیت رونا لیلیٰ سے گوایا تھا۔ فلمساز ، ہدایتکار اور مصنف رنگیلا کی اس کامیاب ترین اردو فلم میں یہ گیت آسیہ پر فلمایا گیا تھا۔

سعید گیلانی کے چند سپرہٹ گیت

سعیدگیلانی کے کریڈٹ پر "سونا نہ چاندی ، نہ کوئی محل ، جان من ، تجھ کو میں دے سکوں گا۔۔" جیسا سپرہٹ گیت بھی تھا جسے فلم بندش (1980) میں روبن گھوش کی دھن میں اخلاق احمد نے گایا تھا اور جو ندیم پر فلمایا گیا تھا۔ یہ گیت ایک ضرب المثل بن گیا تھا اور اخلاق احمد کے فلمی کیرئر کا سب سے مقبول ترین گیت ثابت ہوا تھا۔

نوے کے عشرہ کے بعد کے مقبول ترین گلوکار انوررفیع کو بریک تھرو بھی انھی کے لکھے ہوئے گیت "جانو سن ذرا ، پلکیں تو اٹھا۔۔" سے ملا تھا۔ یہی گیت موسیقار ایم ارشد کی پہچان بنا تھا۔

ملکہ ترنم نورجہاں نے فلم سخی بادشاہ (1996) میں جو آخری سپرہٹ گیت گایا تھا "کی دم دا بھروسہ یار ، دم آوے نہ آوے۔۔" وہ بھی سعیدگیلانی ہی کا لکھا ہوا تھا۔ یہ فلم ایکشن فلموں کے بے تاج بادشاہ ، سلطان راہی کے قتل کے بعد ریلیز ہوئی تھی اور سپرہٹ ہوئی تھی۔ ان کے علاوہ یقیناً بہت سی فلموں میں ان کے بہت سے ہٹ اور سپرہٹ گیت بھی تھے۔

پاکستان فلم میگزین ، ایک انفرادی کاوش

پاکستان فلم میگزین پر سعیدگیلانی کے انفرادی فلم ریکارڈز میں تادم تحریر صرف 179 فلموں کا اندراج ہے جو حتمی نہیں ہے۔ گیتوں کی تعداد فلموں کی تعداد سے بھی کم درج ہے جس کی بڑی وجہ یہ ہے کہ گیتوں کی تفصیل لکھنے کے لیے فلم دیکھنا لازم ہے اور اتنا وقت کہاں ملتا ہے۔

یہ ویب سائٹ ایک انفرادی کاوش ہے جس کے جملہ امور تن تنہا اپنے فارغ اوقات میں سرانجام دیتا ہوں۔ میری ذاتی دلچسپی ، پاکستانی فلموں کے پہلے دو عشروں تک محدود رہی ہے۔ ستر کے عشرہ کے بعد کی فلموں اور گیتوں کے لیے وقت نکالنا مشکل رہا ہے لیکن پھر بھی جیسے تیسے معلومات دستیاب ہوتی ہیں ، انھیں اپ ڈیٹ کرنے کی کوشش کرتا رہتا ہوں تا کہ ریکارڈ مکمل ہو سکے۔

سعید گیلانی اور مسعودرانا کا ساتھ

سعیدگیلانی کی مسعودرانا کے ساتھ ایک درجن فلمیں تھیں لیکن صرف چھ گیتوں کا حوالہ ملتا ہے جن میں سے پہلا گیت "اے پیار ساڈا ، اے اپنی یاری ، مرکے وی نئیں ٹٹنی سجناں ، ویکھے گی دنیا ساری۔۔" فلم عالی جاہ (1978) میں موسیقار وجاہت عطرے نے ریکارڈ کروایا تھا اور فلم میں افضال احمد پر فلمایا گیا تھا۔

فلم میری آواز (1987) میں موسیقار صفدرحسین نے مسعودرانا سے یہ اردو غزل گوائی تھی "پیار کے رنگ سے دنیا کو سجاؤ ، یارو۔۔" گیلانی صاحب کی اس غزل کا ایک شعر بڑا لاجواب تھا "جنگ ہوتی ہے تو انسان مرا کرتے ہیں ، بے ضمیروں کو یہ احساس دلاؤ ، یارو۔۔" اس وقت کے مقبول نوجوان ہیرو اسماعیل شاہ پر یہ غزل فلمائی گئی تھی۔ اس دور کے اور بہت سے گیت ہیں کہ جن میں نغمہ نگاروں کے بارے میں معلومات دستیاب نہیں ہیں۔

سعیدگیلانی ، 1938ء میں پشاور میں پیدا ہوئے تھے اور 5 اپریل 2021ء کو انتقال ہوا۔ اللہ تعالیٰ ، ان کی مغفرت کرے (آمین)