حروفِ تہجی کی تاریخ

قاف ( Qaaf) کی آواز انسانی حلق میں" کوّے" سے متصل ، زبان کی جڑ کے اوپر کے تالو سے ٹکرانے سے نکلتی ہے جو "ک" کی نسبت موٹی ہوتی ہے۔

"ق" کی تاریخ

قدیم فونیشین حروفِ تہجی میں "ق" کا 19واں حرف، "سوئی کے سوراخ" یا Needle eye کے علاوہ "بندر کی علامت" بھی بتایا جاتا ہے جبکہ قدیم مصری ہیروغلیفی تصاویر میں "ق" کی شکل ایک پہاڑ Hill کی طرح نظر آتی ہے۔

حروفِ تہجی کی ترتیب سے "ق"، اردو/پنجابی (قاف) کا 27واں، فارسی (غے) کا 24واں اور عربی (قاف) کا 21واں حرف ہے۔ ہندی زبان میں یہ حرف نہیں ہے لیکن क़ (کا) کے نیچے نقطہ ڈال کر اردو دان طبقے کی تسلی و تشفی کی جاتی ہے۔ "ق"، انگریزی زبان کے 17ویں حرف Q کا متبادل ہے۔

فارسی زبان میں قاف کو "غین" یا "گھ" کی آواز سے ادا کیا جاتا ہے، جیسے "آقا" کو "آغا" وغیرہ کہتے ہیں۔

"ق" اور "ک" کا فرق

ہر زبان کا تعلق کسی مخصوص خطے اور ماحول سے ہوتا ہے لیکن جب وہی زبان دیگر علاقوں تک پھیلتی ہے تو اس کے الفاظ کا تلفظ بدل جاتا ہے جو ایک قدرتی بات ہے۔ عام لوگوں کے لیے ویسے بھی ممکن نہیں ہوتا کہ وہ ایک بدیسی زبان کو صحیح تلفظ کے ساتھ بول سکیں البتہ محنت و مشقت اور توجہ و دلچسپی سے ہر کام ممکن ہے۔

مسلمانوں کی مقدس کتاب، قرآنِ مجید، عربی زبان میں ہے اور مذہبی رہنماؤں کے مطابق، دنیا کے ہر مسلمان کو کم از کم عربی زبان کو پڑھنا ضرور آنا چاہیے۔ اس کے لیے درسِ قرآن کو بنیادی تعلیم و تربیت کا لازمی حصہ سمجھا جاتا ہے جہاں ہر مسلمان بچہ، زندگی میں پہلا قاعدہ عربی کا پڑھتا ہے لیکن یہ حقیقت ہے کہ اکثریت اپنے روزمرہ کے معمولات اور ماحول میں ایک بدیسی زبان اور اس کے قواعدوضوابط کو یاد نہیں رکھ پاتی۔ یہاں تک کہ روزانہ پنج وقتہ نماز میں بھی عربی کے الفاظ کو غلط تلفظ کے ساتھ پڑھتے ہیں جس سے الفاظ کے معانی تک بدل جاتے ہیں۔ ایسے میں ایک عادت پکی ہو جاتی ہے اور کئی اہم الفاظ اور حروف کا تلفظ غلط العام ہو جاتا ہے۔ "ق" اور "ک" اس کی بہت بڑی مثالیں ہیں۔

جیسا کہ پہلے عرض ہوا کہ "ق" کی آواز "ک" کی نسبت موٹی پڑھی جاتی ہے، اسی طرح ان سے لکھے ہوئے الفاظ کے معانی بھی مختلف ہوتے ہیں۔ مثلاً ہر مسلمان سورۃ اخلاص میں "قل ہو اللہ احد" پڑھتا ہے جس کے معانی ہیں: "کہیے، اللہ ایک ہے۔" لیکن اگر"ق" کو "ک" کی طرح سے پڑھا جائے تو عربی میں "کل" کا مطلب بنتا ہے "تمام، سب یا پورا"، اس طرح اس آیت کا ترجمہ ہی مبہم ہو جائے گا۔

"ق" کی خصوصیات

• عربی گرامر میں "ق"، ایک مذکر اور قمری حرف ہے، "ال" لکھا جائے گا تو بولا بھی جائے گا جیسے کہ "القدوس" اور "القہار" وغیرہ۔
• علمِ تجوید میں "ق" کے حرف کو تین الف کے برابر کھینچ کر موٹا پڑھا جاتا ہے۔ یہ "حروفِ مستعلیہ" یعنی ہمیشہ موٹا پڑھے جانے والے 7 حروف (خ، ص، ض، ط، ظ، غ، ق) میں سے ایک ہے۔ یہ "حروفِ قلقلہ" یعنی ان 5 حروف (ب، ج، ط، ق، د) میں شامل ہے جو ساکن ہوں تو انھیں سختی کے ساتھ جنبش دے کر یا ہلا کر پڑھنا چاہیے۔
• قرآنِ مجید کی 50 سورۃ کا نام "ق" ہے جبکہ تلاوت کے دوران جب آیات میں "ق" کی علامت آئے تو وہاں رکنا نہیں چاہیے۔
• علمِ ہجا میں "ق" کو "قافِ قرشت" کہتے ہیں جس کا تعلق "حروفِ لہویہ" یا "حروفِ حلقی" (Velar) سے ہے۔
• فنِ خطاطی میں "ق"، ایک "اصلی حرف" ہے جو خطِ نستعلیق میں چاروں لائنوں میں لکھا جاتا ہے۔
• حسابِ ابجد میں "ق"، 19واں حرف (قرشت) ہے جس کے 100 عدد شمار ہوتے ہیں۔
• علم الاعداد میں "ق"، ایک "آبی حرف" ہے جس کی تاثیر "پانی"، برج جوزا (Gemini) اور سیارہ مشتری (Jupiter) ہے۔