پہلی آئینی ترمیم: سقوطِ مشرقی پاکستان

23 اپریل 1974ء کو آئینِ پاکستان میں کی گئی پہلی آئینی ترمیم میں پاکستان کی جغرافیائی حدود کا ازسرنو تعین کیا گیا جس میں مشرقی پاکستان کو پاکستان کے نقشہ سے حذف کر دیا گیا جو 16 دسمبر 1971ء کو بنگلہ دیش بن گیا تھا اور جس کو 22 فروری 1974ء کو پاکستان نے بھی ایک آزاد ملک کے طور پر تسلیم کر لیا تھا۔

پہلی آئینی ترمیم کیسے ہوئی؟

بھٹو حکومت نے بنگلہ دیش کو تسلیم کرنے کے لیے 7 جولائی 1973ء کو باقاعدہ طور پر سپریم کورٹ سے اجازت طلب کی تھی۔ عدالتِ عالیہ کی منظوری کے بعد 10 جولائی 1973ء کو قومی اسمبلی نے بھی بنگلہ دیش کو تسلیم کرنے کی اجازت دے دی تھی۔

23 اپریل 1974ء کو قومی اسمبلی نے یہ ترمیم صفر کے مقابے میں 104 وؤٹوں کی اکثریت سے منظور کی۔ دو بڑی اپوزیشن جماعتوں، نیشنل عوامی پارٹی (نیپ) اور جمیعت العلمائے اسلام نے بھی اس ترمیم کے حق میں وؤٹ دیے جبکہ 13 ارکانِ پارلیمنٹ نے رائے شماری میں حصہ نہیں لیا تھا۔

25 اپریل 1974ء کو سینٹ نے بھی اس آئینی ترمیم کی منظوری دے دی تھی۔ 25 وؤٹ آئینی ترمیم کے حق میں جبکہ دو وؤٹ مخالفت میں آئے تھے۔ 4 مئی 1974ء کو صدر نے منظوری دی اور 8 مئی 1974ء کو اس پہلی آئینی ترمیم کا سرکاری گزٹ جاری ہوا تھا۔

پہلی آئینی ترمیم کی عبارت

اسلامی جمہوریہ پاکستان کے آئین کے آرٹیکل ایک میں شق (2)، (3) اور (4) کے مطابق پاکستان ان علاقوں پر مشتمل ہوگا:

• صوبہ بلوچستان، شمال مغربی سرحدی صوبہ، صوبہ پنجاب اور صوبہ سندھ
• اسلام آباد کیپٹل ایریا، جسے بعد میں وفاقی دارالحکومت کہا جائے گا
• وفاق کے زیر انتظام قبائلی علاقے اور ایسی ریاستیں اور علاقے جو پاکستان میں الحاق یا کسی دوسری صورت میں شامل ہیں یا ہو سکتے ہیں۔
• قومی اسمبلی، نئی وفاقی ریاستوں یا علاقوں کے لیے حسبِ ضرورت قانون سازی کر سکتی ہے۔

اس کے علاوہ عدلیہ اور فوج کے بارے میں متعدد وضاحتوں کے علاوہ آرٹیکل 17 میں یہ اہم ترمیم بھی کی گئی جس کو بنیاد بنا کر بھٹو حکومت نے نیشنل عوامی پارٹی (نیپ) پر پابندی لگائی تھی:

• ہر شہری کو جو سرکاری ملازم نہیں، اسے کسی سیاسی پارٹی سے تعلق رکھنے یا اس کا رکن بننے کا حق حاصل ہوگا۔
• پاکستان کی خودمختاری یا سالمیت کے خلاف کام کرنے والی کسی بھی سیاسی پارٹی پر حکومت پابندی لگا سکتی ہے لیکن اعلان کے پندرہ روز کے اندر معاملہ سپریم کورٹ تک پہنچائے گی جہاں حتمی فیصلہ ہوگا۔
• ہر سیاسی جماعت، قانون کے مطابق اپنے فنڈز کے ذرائع کا حساب دے گی۔