اقوام متحدہ کے مطابق 11 جولائی 2020ء کو پاکستان ، آبادی کے لحاظ سے دنیا کا پانچواں بڑا ملک بن چکا ہے اور اس کی 22 کروڑ ، 10 لاکھ کی آبادی دنیا بھر میں چین ، بھارت ، امریکہ اور انڈونیشیا کے بعد سب سے زیادہ ہے۔

ہر پانچ سیکنڈ بعد ایک بچہ

دنیا بھر میں آبادی کے اضافے کی اوسط شرح دو فیصد ہے لیکن پاکستان میں 2.8 فیصد ہے اور ایک منٹ میں 11 بچے یا ہر پانچ سیکنڈ میں ایک بچہ پیدا ہورہا ہے۔ پاکستان میں فی کنبہ تقریباَ سات افراد ہوتے ہیں جو پوری دنیا میں پانچویں نمبر پر سب سے بڑے خاندان کا حجم ہے۔ اس فہرست میں بھارت 49ویں اور بنگلہ دیش 55ویں نمبر پر ہے۔ یاد رہے کہ متحدہ پاکستان میں مشرقی پاکستان (بنگلہ دیش) کی آبادی ، مغربی یا موجودہ پاکستان سے کم از کم ایک کروڑ زیادہ ہوتی تھی لیکن اب ہم ، خدا کے فضل سے ، ان سے پانچ کروڑ زیادہ آبادی والے ملک ہیں۔۔!

مردم شماریوں کے اعدادوشمار

پاکستان میں 1951ء سے اب تک ہونے والی تمام مردم شماریوں کے اعدادوشمار ملاحظہ فرمائیں:

• پہلی مردم شماری فروری 1951ء میں ہوئی تھی جس کے مطابق پورے ملک کی آبادی 7 کروڑ ، 56 لاکھ ، 42 ہزار افراد پر مشتمل تھی جس میں سے مشرقی پاکستان کی آبادی 4 کروڑ ، 42 لاکھ ، 63 ہزار (55.6 فیصد) اور مغربی پاکستان یا موجودہ پاکستان کی آبادی 3 کروڑ ، 37 لاکھ ، 40 ہزار (44.4 فیصد) تھی۔
• دوسری مردم شماری جنوری 1961ء میں ہوئی تھی جس کے مطابق پورے ملک کی آبادی 9 کروڑ ، 28 لاکھ افراد پر مشتمل تھی اور پاکستان دنیا کا چھٹا بڑا آبادی والا ملک تھا۔ اس میں سے موجودہ پاکستان کی آبادی 4 کروڑ ، 28 لاکھ ، 80 ہزار افراد پر مشتمل تھی۔
• تیسری مردم شماری ستمبر 1972ء میں ہوئی تھی جس کے مطابق پاکستان کی کل آبادی 6 کروڑ 53 لاکھ ، 9 ہزار افراد پر مشتمل تھی۔
• چوتھی مردم شماری جولائی 1981ء میں ہوئی تھی جس کے مطابق پاکستان کی آبادی 8 کروڑ ، 42 لاکھ ، 54 ہزار افراد پر مشتمل تھی اور پاکستان دنیا کا نواں بڑا ملک تھا۔
• پانچویں مردم شماری ، 17 سال کے وقفے کے بعد مارچ 1998ء میں ہوئی تھی جس کے مطابق پاکستان کی کل آبادی 13 کروڑ ،23 لاکھ ، 52 ہزار افراد پر مشتمل تھی۔
• چھٹی اور اب تک کی آخری مردم شماری 19 سال کے وقفے کے بعد مئی 2017ء میں ہوئی تھی جس کے مطابق پاکستان کی کل آبادی 20 کروڑ ، 77 لاکھ ، 74 ہزار افراد پر مشتمل تھی اور پاکستان دنیا کا چھٹا بڑا آبادی والا ملک تھا۔