محمد علی بوگرا فارمولا

پاکستان کے پہلے کٹھ پتلی وزیر اعظم
محمد علی بوگرا

پہلے کٹھ پتلی وزیراعظم

پاکستان کے پہلے کٹھ پتلی وزیر اعظم محمد علی بوگرا ، امریکہ میں سفیر تھے اور "چھٹیوں پر" وطن واپس آئے ہوئے تھے کہ انہیں 17 اپریل 1953ء کو بظاہر غیر متوقع طور پر لیکن ایک طے شدہ منصوبہ کے تحت اس وقت کی "خلائی مخلوق" نے وزیر اعظم بنا دیا تھا۔۔!

امریکی گندم کی آمد

اس سے قبل دوسرے وزیر اعظم خواجہ ناظم الدین کی حکومت کو برخاست کرنے کا پورا پورا بندوبست کیا گیا تھا جن میں لسانی اور مذہبی فسادات کے علاوہ غذائی بحران بھی پیدا کیا گیا تھا۔ بھوکی قوم کا پیٹ بھرنے کے لئے مستقبل کے ان داتا امریکہ بہادر سے گندم بھی منگوائی گئی تھی جسے اونٹ گاڑیوں پر لاد کر کراچی کی سڑکوں پر گھمایا گیا تھا اور اونٹوں کے گلے میں تختیاں لٹکائی گئی تھیں جن پر "تھینک یو امریکہ" لکھا ہوا تھا۔

حاضرسروس جرنیل ، وزیردفاع

اسی سال یعنی ستمبر 1953ء میں آرمی چیف جنرل ایوب خان نے امریکہ کا سرکاری دورہ کیا تھا جس میں روس کے خلاف فوجی معاہدوں کے علاوہ فوجی اور اقتصادی امداد کا ایک بڑا پیکج بھی ساتھ لائے تھے۔ یہ سب انتظام کرنے کے بعد کٹھ پتلی حکومت نے ایک حاضر سروس جنرل کو وزیر دفاع بھی بنا دیا گیا تھا جس سے پاکستان کےمستقبل کا سیاسی خاکہ بھی تیار ہو گیا تھا۔ غریب کی جورو کی طرح مسلم لیگ ہر طالع آزما کی بھابھی بن گئی تھی اور 17 اکتوبر 1953ء کو بوگرا صاحب کو مسلم لیگ کا صدر بھی بنا دیا گیا تھا۔ بنگالیوں کو 7 مئی 1954ء کو بنگالی کو دوسری قومی زبان بنانے کا لالی پاپ بھی دیا گیا تھا لیکن 8 مارچ 1954ء کے صوبائی انتخابات میں مشرقی پاکستان سے مسلم لیگ کا مکمل صفایا ہو گیا تھا۔

ون یونٹ کس کے ذہن کی اختراع تھی؟

12 اگست 1955ء کو کام مکمل ہونے اور پر پھڑپھڑانے کی ناکام کوشش میں بوگرا صاحب کی چھٹی کروا کر واپس امریکہ میں سفیر کے عہدہ پر پہنچا دیا گیا تھا۔ پرانی خدمات کے عوض 1962/63ء میں انہیں ایوب حکومت نے وزیر خارجہ بھی بنایا تھا اور اسی حیثیت میں 23 جنوری 1963ء کو ان کا انتقال ہو گیا تھا۔ 22 نومبر 1954ء کو ریڈیو پاکستان کی اس نشری تقریر میں وہ جنرل ایوب خان کے ذہن کی اختراع "ون یونٹ" یا جسے تاریخ میں "بوگرا فارمولا" بھی کہا جاتا ہے ، کے قیام کی بھر پور انداز میں وکالت کر رہے ہیں۔

دو متضاد بوگرا فارمولے

دلچسپ بات یہ ہے کہ 22 نومبر 1954ء کا یہ "بوگرا فارمولا" اس "بوگرا فارمولا" کا مکمل یوٹرن تھا جو 5 اکتوبر 1953ء کو انہی کی قیادت میں حکمران جماعت مسلم لیگ نے منظور کیا تھا جو کچھ اس طرح سے تھا:

• وفاقی پارلیمان کے دو ایوان ہوں گے جنہیں مساوی اختیارات حاصل ہوں گے۔
• ایوان بالا (یا آج کا سینٹ) کے ارکان کی تعداد 50 ہوگی جن میں پانچوں یونٹوں یعنی (1) مشرقی بنگال ، (2) مغربی پنجاب ، (3) سندھ اور ریاست خیرپور ، (4) صوبہ سرحد مع سرحدی ریاستیں اور قبائلی علاقے اور (5) کراچی ، بلوچستان اور ریاست بہاولپور سے دس دس ارکان منتخب ہوں گے۔
• ایوان زیریں (یا آج کی قومی اسمبلی) 300 ارکان پر مشتمل ہوگی جن میں سے پہلے یونٹ یعنی مشرقی بنگال سے 165 ، دوسرے یونٹ یعنی مغربی پنجاب سے 75 ، تیسرے یونٹ یعنی سندھ اور ریاست خیرپور سے 19 ، چوتھے یونٹ یعنی سرحد ، سرحدی ریاستوں اور قبائلی علاقوں سے 24 اور پانچویں یونٹ یعنی وفاق کے زیرانتظام کراچی ، بلوچستان اور ریاست بہاولپور سے 17 ارکان براہ راست انتخابات سے منتخب ہوں گے۔