پاکستان پولیس

پاکستان پولیس کا قیام 1861ء میں عمل میں آیا تھا۔۔!

پاکستان میں پولیس کا محکمہ وفاقی، صوبائی اور علاقائی سطح پر مختلف حصوں میں تقسیم ہے جو امن و امان، ریاستی اجارہ داری، عوام الناس کے جان و مال کے تحفظ، جرائم کی روک تھام اور سرکاری محصولات کی وصولی کے لیے استعمال ہوتا ہے۔

مغل دور میں شہروں میں کوتوال (پولیس سٹیشن) میں داروغہ (پولیس انسپکٹر) اور دیہاتوں میں چوکیدارانہ نظام ہوتا تھا لیکن پاکستان میں موجودہ پولیس نظام، انگریز راج کی یاد ہے۔

پولیس ایکٹ 1861ء

انگریزوں نے ہندوستان پر مکمل قبضہ کرنے کے بعد 17 اگست 1860ء کو ایک پولیس کمیشن کی رپورٹ کے مطابق 22 مارچ 1861ء کو ایک پولیس ایکٹ تشکیل دیا جس کی روشنی میں ملک گیر محکمہ پولیس قائم کیا۔ آج بھی پولیس کا محکمہ اسی ایکٹ پر قائم ہے اور اس کو آئینی تحفظ حاصل ہے۔ 2002ء میں پولیس ایکٹ میں تبدیلی کی کوشش کی گئی جو کامیاب نہیں ہوئی۔

پاکستان پولیس کی تاریخ

پاکستان پولیس کا باقاعدہ آغاز تو 1948ء کو ہوا لیکن موجودہ صوبوں میں سب سے پہلے انگریز دور میں تجرباتی طور پر سندھ میں 1843ء میں محکمہ پولیس کا آغاز ہوا تھا۔ پولیس ایکٹ کی منظوری کے بعد پنجاب میں 1861ء اور خیبرپختونخواہ میں 1889ء، میں پولیس محکمے بنے۔ ون یونٹ کی تنسیخ کے بعد بلوچستان میں 1970ء، گلگت و بلتستان میں 1972ء اور وفاقی دارالحکومت اسلام آباد میں 1981ء میں پولیس کے محکمے قائم ہوئے۔ ان کے علاوہ پاکستان کے زیرِ انتظام آزاد کشمیر پولیس کا بھی الگ محکمہ ہے۔

پولیس کے رینکس

• IGP یا انسپکٹر جنرل آف پولیس (گریڈ 22)
• Addl.IG ایڈیشنل انسپکٹر جنرل (گریڈ 21)
• DIG یا ڈپٹی انسپکٹر پولیس (گریڈ 20)
• SSP/AIG یا سینئر سپرنٹنڈٹ آف پولیس یا اسسٹنٹ انسپکٹرجنرل (گریڈ 19)
• SP یا سپرنٹنڈنٹ آف پولیس (گریڈ 18)
• ASP/DSP یا اسسٹنٹ سپرنٹنڈنٹ آف پولیس/ڈپٹی سپرنٹنڈنٹ آف پولیس (گریڈ 17)
• Inspector یا پولیس انسپکٹر (گریڈ 16)
• ASI یا اسسٹنٹ سب انسپکٹر (گریڈ 11)
• HC یا ہیڈ کانسٹیبل (گریڈ 9)
• PC یا کانسٹیبل (گریڈ 7)

پاکستان پولیس میں چار لاکھ کے قریب اہلکار ہیں جن میں سے ایک فیصد خواتین ہیں۔