جنرل یحییٰ کی ہوس اقتدار

پاکستان پر قابض فوجی آمر جنرل یحییٰ خان ایک غیر ملکی نشریاتی ادارے کو انٹرویو دیتے ہوئے یہ دعویٰ کر رہا ہے کہ انتخابات 1970ء کے بعد وہ صدر کے عہدہ پر نہیں رہے گا۔۔!

کاش ، اپنے اس وعدے کا وہ پاس بھی کرتا لیکن ہاتھی کے دانت کھانے کے اور ، اور دکھانے کے اور ہوتے ہیں۔۔!

جنرل یحییٰ نے جنرل ایوب کا تختہ کیوں الٹا؟

پاکستان کی تاریخ کے اس انتہائی نااہل حکمران نے ملک تڑوا لیا تھا لیکن اپنے ناجائز اقتدار سے دستبردار ہونے کو تیار نہیں تھا۔ اگر وہ اتنا ہی مخلص اور معصوم ہوتا تو اپنے پیش رو جنرل ایوب خان کا تختہ الٹنے کی بجائے مروجہ آئین کے تحت صدارتی انتخابات ہونے دیتا لیکن اس انتخابی عمل سے بھٹو ، صدر بن سکتا تھا جو اس وقت تک قوم کا ہیرو بن چکا تھا اور جس سے غاصبوں اور جابروں کا ٹولہ بڑا خوفزدہ تھا۔

جنرل یحییٰ خان اور بھٹو کی مخاصمت کیوں تھی ؟

حقیقت میں ذوالفقار علی بھٹو ہی کے خوف سے 1970ء میں پہلی بار عام انتخابات کروائے گئے تھے تاکہ بنگالیوں کی عددی برتری کے باعث اسے حکومت میں آنے سے روکا جا سکے۔ بنگالیوں کو اتنا بے بس اور بے ضرر سمجھ لیا گیا تھا کہ ان سے ان غاصبوں کو اپنے اقتدار کے لئے کوئی خطرہ محسوس نہیں ہوتا تھا لیکن جب شیخ مجیب کو برتری حاصل ہو گئی تھی تو اسے حکومت دینے کے بجائے پہلے سے طے شدہ منصوبے کے تحت بنگالیوں پر یلغار کر دی گئی تھی۔ پھر تاریخ نے دیکھا کہ کس طرح مسلمانوں کی تاریخ کو داغدار کیا گیا اور اپنے ناجائز اقتدار کی ہوس میں خون کی ندیاں تک بہا دی گئی تھیں۔

1965ء کی جنگ کے بعد یحییٰ خان اور بھٹو میں شدید نفرت پیدا ہوچکی تھی کیونکہ بھٹو ، یحییٰ کو جنگ میں ناکامی کا ذمہ دار سمجھتا تھا۔ اکھنور کی جانب پیش قدمی محض جنرل یحییٰ کی نااہلی کی وجہ سے رک گئی تھی اور کشمیر کو آزاد کروانے کے لئے بھٹو کا تجویز کردہ آپریشن جبرالٹر بری طرح سے ناکام ہو گیا تھا۔