جنرل یحییٰ خان

عہدہ: آرمی چیف (کمانڈر انچیف) ، صدر ، چیف مارشل لاء ایڈمنسٹریٹر
میعاد: 18ستمبر 1966ء تا 20 دسمبر 1971ء …… فوجی سروس: 1938ء …… تا …… 1971ء
صدارت: 25 مارچ 1969ء تا 20 دسمبر 1971ء
حیات: 4 فروری 1917ء تا 10 اگست 1980 …… تعلق: پشاور/قزلباش …… زبان: فارسی

پاکستان کاپانچواں آرمی چیف ، جنرل یحییٰ خان ، پاکستان ہی نہیں بلکہ اسلامی تاریخ کا ایک بہت بڑا ولن ثابت ہوا کہ جس کے دور میں پاکستانی فوج کو تاریخ کی ایک شرمناک ترین فوجی شکست ہوئی تھی۔ مشرقی پاکستان میں فوجی ایکشن اور مغربی پاکستان سے بھارت پر حملہ کرنا اس کے فوجی کیرئر کے تباہ کن فیصلے ثابت ہوئے تھے جن میں پاکستان کا پہلا وائس آرمی چیف جنر ل حمید بھی برابر کا شریک تھا جو ایک فور سٹار جنرل بنا دیا گیا تھا۔

ایک عیاش اور نااہل جرنیل

بتایا جاتا ہے کہ جنرل یحییٰ خان جیسے بدکردار اور عیاش جرنیل کو دو سینئر جرنیلوں پر فوقیت دے کر آرمی چیف بنا کر صدر جنرل ایوب خان نے پاکستان سے سب بڑی دشمنی کی تھی۔ اس کی کارکردگی بھی کوئی مثالی نہ تھی بلکہ جب1965ء کی جنگ میں اکھنور کی طرف جنرل اختر حسین ملک کی قیادت میں کامیاب پیش قدمی ہو رہی تھی توکاروائی کے دوران کمان یحییٰ خان کے سپر د کرنے میں 36 گھنٹے لگ گئے تھے جس سے میدان جنگ کا نقشہ بدل گیا تھا۔ اس کوتاہی اور نااہلی کے باوجود اسے آرمی چیف بنانا اچھنبے کی بات تھی۔

ہوس اقتدار میں ملک تڑوا لیا

جنرل یحییٰ خان ، اپنے ابتدائی دو ر میں تو بڑا فرمانبردار رہا لیکن جب صدر جنرل ایوب خان کا زوال شروع ہوا تو موصوف کے پر پرزے نکل آئے تھے اور وہ پہلا فوجی جنرل بنا جس نے اپنے سابقہ باس کی حکومت پر قبضہ کیا تھا اورجس نے ملک گیر مارشل لاء بھی لگایا تھا۔ گو اس نے کچھ نیک کام بھی کئے تھے جن میں سے ون یونٹ توڑنا ، صوبے بحال کرنا ، آزادانہ اور منصفانہ انتخابات منعقد کراناشامل ہیں لیکن انتقال اقتدار میں وہ ویسا ہی بددیانت تھا جیسا جنرل ضیاع اپنی 8ویں ترمیم یا جنرل مشرف 17ویں ترمیم کی صورت میں تھے۔ وہ بھی ایک ایسے آئین کی تشکیل پر بضد تھا جس میں طاقت کا منبع صدر یا آرمی چیف رہے لیکن اکثریتی پارٹی لیڈر شیخ مجیب الرحمان اسے یہ حق دینے کو کسی طور بھی تیار نہیں تھا۔ جنرل یحییٰ نے ملک تڑوا لیا لیکن اقتدار سے دستبردار ہونے کو تیار نہیں تھا۔ اگر سقوط ڈھاکہ نہ ہوتا تو وہ کبھی بھی سولین کو حکومت نہ دیتا جو اس کے اس پریس ریلیز سے ظاہر تھا جو اس نے 20 دسمبر 1971ء سے نئے آئین کی صورت میں ملک پر مسلط کرنا تھا۔