بنگلہ دیش کے قیام کا اعلان

شیخ مجیب الرحمان
نے 5 دسمبر 1969ء کو
مشرقی پاکستان کو بنگلہ دیش کا نام دیا تھا

26 مارچ 1971ء کو بنگلہ دیش کے بانی شیخ مجیب الرحمان نے پاکستان سے علیحدگی اور آزاد بنگلہ دیش کے قیام کا اعلان کر دیا تھا۔۔!

مشرقی پاکستان کو بنگلہ دیش کا نام کب ملا؟

قبل ازیں ، دو سال قبل ، یعنی 5 دسمبر 1969ء کو وہ ، مشرقی پاکستان کو بنگلہ دیش کا نام دے چکے تھے۔ 1968ء میں اگر تلہ سازش کیس میں عملی طور پر سامنے آچکے تھے اور اسی ایجنڈے پر انھوں نے 1970ء کے انتخابات جیتے بھی تھے جو اصل میں بنگلہ دیش کے قیام کا ریفرنڈم تھا۔۔!

پاکستان سے علیحدگی اور ایک آزاد بنگلہ دیش کے قیام کی وجہ یہ تھی کہ 25 مارچ 1971ء کو پاکستان کے فوجی صدر جنرل یحییٰ خان نے 1970ء کے انتخابات میں فتح حاصل کرنے والی عوامی لیگ پر پابندی لگائی۔ متوقع وزیراعظم ، شیخ مجیب الرحمان کو غدار قرار دیا اور مشرقی پاکستان میں "آپریشن سرچ لائٹ" کا حکم دیا جس میں بنگالیوں کی نسل کشی کی گئی اور طاقت کے بل بوتے پر بنگالیوں کی جدوجہد آزادی کو کچلنے کی ناکام کوشش کی گئی۔ نتیجہ 16 دسمبر 1971ء کو سقوط مشرقی پاکستان اور بنگلہ دیش کا قیام تھا۔

مشرقی پاکستان میں فوجی آپریشن کیوں ہوا؟

اس فوجی آپریشن کی وجہ یہ تھی کہ مجیب الرحمان ، آخری وقت تک بضد تھے کہ وہ پاکستان کا آئین صرف اپنے چھ نکات پر ہی بنائیں گے جس میں مشرقی پاکستان اور دیگر صوبوں کو قرارداد لاہور 1940ء کے مطابق مکمل خودمختاری ہوگی۔ یہ بات مقتدر طاقتوں کے لیے کسی طور پر قابل قبول نہیں تھی جو اس سے قبل ون یونٹ بنا کر صوبے ہی ختم کر چکے تھے تاکہ آمرانہ صدارتی نظام چلایا جا سکے کجا انھیں کسی قسم کی آزادی دی جائے۔

جب جنرل یحییٰ خان نے مشرقی پاکستان میں فوجی آپریشن کا اعلان کیا تھا تو مغربی پاکستان کے لیڈر ذوالفقار علی بھٹوؒ ، ڈھاکہ میں مجیب اور یحییٰ کے ساتھ سہ طرفی مذاکرات کر رہے تھے لیکن باقی پاکستانی قوم کی طرح اس خبر کا ان دونوں سیاستی رہنماؤں کو بھی علم نہیں تھا۔ مزے کی بات ہے کہ جب بھٹو ، واپس کراچی پہنچے تو ان سے ڈھاکہ کی صورتحال کے بارے میں استفسار کیا گیا تو ان سے یہ بیان منسوب کیا گیا تھا کہ "خدا کا شکر ہے کہ پاکستان بچ گیا ہے۔۔" بھٹو سے بغض رکھنے والے بددیانت لوگ ، اس بیان کو ان کے سانحہ مشرقی پاکستان میں ملوث ہونے کے ایک ثبوت کے طور پر پیش کرتے رہے ہیں جس سے ان کی بیمار ذہنی سوچ کا اندازہ لگایا جاسکتا ہے۔