سانحہ 9 مئی 2023

سانحہ 9 مئی 2023

9 مئی 2023ء کو سابق وزیر اعظم عمران خان کی "القادر ٹرسٹ" کرپشن کیس میں گرفتاری کے ردعمل کے طور پر ان کی پارٹی کے مشتعل کارکنوں نے مبینہ طور پر ملک بھر میں بڑے منظم طریقے سے 300 سے زائد مختلف مقامات پر فوجی اور سرکاری تنصیبات کو نشانہ بنایا۔

سرکاری طور پر ان تخریبی کاروائیوں میں پنجاب میں 8 ، پختون خواہ میں 3 اور سندھ اور بلوچستان میں ایک ایک فوجی تنصیبات کو نقصان پہنچایا گیا۔ 16 دہشت گرد ہلاک 179 زخمی ہوئے جبکہ 181 سرکاری اہلکار زخمی ہوئے۔

9 مئی 2023ء کی تخریب کاری کے اہم واقعات

• راولپنڈی میں پاک فوج کے ہیڈکوارٹر GHQ کے گیٹ پر حملہ اور وہاں ایک فوجی مجسمہ کی تباہی
• ISI کے ہیڈکوارٹر حمزہ کیمپ فیض آباد اور ایک میٹرو سٹیشن پر حملے اور توڑ پھوڑ
• لاہور میں "جناح ہاؤس" یا فوج کے کورکمانڈر کا گھر کی تباہی و بربادی
• لاہور کینٹ میں "عسکری مال" اور CSD کی عمارتیں
• لاہور میں وزیراعظم ہاؤس اور نون لیگ کا ماڈل ٹاؤن میں پارٹی دفتر
• فیصل آباد میں ISI کے دفاتر اور وزیرداخلہ کے گھر پر حملے
• سرگودھا میں پاکستان ایئر فورس کی یادگار ، ایم ایم عالم کے طیارے کی تباہی
• میانوالی میں ایئر فورس بیس پر حملہ
• گوجرانوالہ ، ملتان اور کراچی میں بھی سرکاری املاک کی تباہی
• کراچی میں رینجرز کی چیک پوسٹ کو نذر آتش کیا گیا
• پشاور میں ریڈیو پاکستان کی تاریخ عمارت کو آگ لگائی گئی
• پشاور میں ایدھی کی ایمبولینس بھی جلائی گئیں
• پختون خواہ میں مختلف مقامات پر تخریب کاری ہوئی ، سکول تک جلائے گئے

2007ء کی دہشت گردی کا اعادہ

یاد رہے کہ جنرل پرویز مشرف کے دور میں 24 نومبر 2007ء کو ایسے ہی دہشت گردی کے واقعات ہوئے تھے جب راولپنڈی میں GHQ اور فیض آباد میں ISI کے کیمپ پر خودکش حملے ہوئے تھے۔ ان واقعات کے پیچھے پاکستانی طالبان کا ہاتھ بتایا گیا تھا جو مبینہ طور پر اب تحریک انصاف کا حصہ بن چکے ہیں۔

حمزہ کیمپ کیا ہے؟

راولپنڈی اور اسلام آباد کے سنگم پر واقع فیض آباد کے علاقہ میں "حمزہ کیمپ" پہلے "اوجڑی کیمپ" کہلاتا تھا جہاں ISI کے دفاتر اور ان کے اہلکاروں کی رہائش گاہیں ہوتی تھیں۔ 1980 کی دہائی میں نام نہاد افغان جہاد کے لیے "مجاہدین" کو اسلحہ فراہم کرنے والا یہ سب سے بڑا مرکز ہوتا تھا۔

10 اپریل 1988ء کو یہاں پراسرار دھماکے ہوئے جنھوں نے راولپنڈی اور اسلام آباد کے جڑواں شہروں میں قیامت صغریٰ برپا کر دی تھی اور ہزاروں افراد ہلاک و زخمی ہوئے تھے۔

اس وقت کے کٹھ پتلی وزیراعظم محمد خان جونیجو نے ان دھماکوں کی تحقیقات کروانے کی کوشش کی لیکن اس جرم میں انھیں پاکستان پر مسلط آمر جنرل ضیاع مردود نے کرپشن کے الزامات لگا کر برطرف کر دیا تھا۔

"یوم مذمت غدارِ پاکستان"

27 مئی 2023ء کو راولپنڈی اور اسلام آباد کے دیواروں پر Wall of Shame کے نام سے بینر لگائے گئے جن میں تحریک انصاف کے رہنماؤں اور حمایتی صحافیوں کی تصاویر بنا کر ان پر لعنت کی علامتیں لگائی گئی ہیں۔ دلچسپ بات یہ ہے کہ ان بینروں پر اسد عمر نہیں ہیں ، جو ایک سابق جنرل کے بیٹے ہیں جن کا سقوط ڈھاکہ میں ایک اہم کردار تھا۔