راشد منہاس شہید

20 اگست 1971ء کو پاک فضائیہ کے ایک بیس سالہ نوجوان پائلٹ، راشد منہاس نے اپنی جان کا نذرانہ دے کر ایک تربیتی طیارہ کو بھارت لے جانے کی کوشش ناکام بنا دی جس پر اس بہادر ہواباز کو پاکستان کا سب سے بڑا فوجی ایوارڈ "نشان حیدر" دیا گیا تھا۔

جب ائرفورس کا طیارہ اغواء ہوا

تفصیلات کے مطابق پاکستان ائر فورس کے مسرور بیس پر پائلٹ آفیسر راشد منہاس اپنی دوسری سولو تربیتی پرواز پر روانہ ہوئے۔ ابھی ان کا طیارہ رن وے پر ہی تھا کہ اسے ان کے انسٹرکٹر فلائیٹ لیفٹینت مطیع الرحمن نے روک لیا۔ وہ طیارے میں سوار ہوا اور دوسرے کنٹرول کے ذریعے طیارے پر قابض ہوگیا۔ اس نے وائر لیس کے ذریعے کراچی میں اپنے ساتھیوں کو پیغام دیا کہ وہ طیارہ اغوا کرکے بھارت لے جارہا ہے۔ راشد منہاس نے صورت حال کا اندازہ لگاتے ہوئے کنٹرول ٹاور کو اپنے طیارے کے اغوا کی اطلاع دی اور مزاحمت کرنا چاہی۔ طیارہ ٹھٹھہ کی حدود تک ہی پہنچا تھا اورتیس چالیس فٹ کی بلندی پر پرواز کررہا تھا کہ اچانک ایک دھماکے سے زمین سے ٹکرا کر تباہ ہوگیا۔

پاکستان کا غدار، بنگالیوں کا ہیرو!

دلچسپ بات یہ تھی کہ پاکستان کا غدار، بنگالی نژاد مطیع الرحمان جو طیارے کو اغوا کر کے جودھپور ، بھارت لے جانا چاہتا تھا ، وہ بنگلہ دیش کا ہیرو بنا اور اسے انہوں نے اپنے ملک کا سب سے بڑا فوجی ایوارڈ دیا تھا۔ اس کی لاش پینتیس سال بعد 24 جون 2006ء کو بنگلہ دیش لے جاکر پورے سرکاری اعزاز کے ساتھ دفنائی گئی تھی۔ اسے قومی ہیرو قرار دے کر اس کے نام پر ایک بیس کا نام بھی رکھا گیا جبکہ اس پر دو فلمیں بھی بنائی گئی تھیں۔

کم عمر ترین نشانِ حیدر کے حقدار

راشد منہاس نے اپنی جان دے دی تھی لیکن اپنا طیارہ دشمن کے ملک میں نہیں جانے دیا تھا۔ اس بہادری پر 29 اگست 1971ء کو صدر پاکستان جنرل یحییٰ خان نے راشد منہاس شہید کو پاکستان میں جرات اور شجاعت کا سب سے بڑا اعزاز نشان حیدر عطا کرنے کا اعلان کیا۔ وہ یہ عظیم اعزاز حاصل کرنے والے پاکستان کے چوتھے ، ائرفورس کے پہلے اور سب سے کم عمر ترین قومی ہیرو تھے۔

راشد منہاس ، 17 فروری 1951ء کو کراچی میں پیدا ہوئے۔ 1968ء میں ائرفورس کو جوائن کیا۔ 13 مارچ 1971ء کو پائلٹ آفیسر بنے اور صرف بیس سال کی عمر میں 20 اگست 1971ء کو شہید ہوگئے تھے۔

راشد منہاس کی شہادت